«Табасарандин нурар» газатдин ццийин йисандин 1-пи нумрайиъ чап дапIнайи «Грепплингдиан чемпионар гъахьну» макьалайин аьхириъ, материалиъ чпикан гаф-чIал гъябгъюрайи чемпионариз редакцияйиз дих апIидича кIури, мялумат тувнийча. Сарпирди Мягьячгъалайиъ яшамиш шулайи Табасаран райондин Заан Гюгьрягъ гъулан агьали, грепплингдиан швуб-саб ражари чемпион духьнайи Аллагьверди Аьшурбегов редакцияйин хялижв гъахьну.
Сюгьбат ккебгъри, Аллагьвердийи чав му спортдиз фици гъафнуш ктибтнийи. Думу 5 йисандин яшариъ айи вахтна дугъан адашдин дустру Аллагьверди дзюдойиин машгъул хьуз спортзализ хъади гъушнийи. Гьаддихъан мина му бай спортдихьан зат ярхла гъахьундар.
«Эвелиан узу дзюдойиин машгъул хьуз хъюгъю вахтари ихь республикайиъ грепплинг адайи. Грепплинг спортдин жюрбежюр жюрйирин (дзюдойин, самбойин, юкьяр дисбан ва джиу-джитсуйин) приемар ишлетмиш апIурайи спортдин цIийи жюре ву, ва дидиъ талитназ удучIвнайириз йивуз ихтияр адар. Талитнаъ гъалиб хьпан бадали, бугъмиш апIбан ва иццру апIбан приемар ишлетмиш апIуз ихтияр а. Хъа сабсанубдикан дарпиди гъибтуз шулдар. Му спортдиин машгъул вуйи спортсменар кьюб жюрейиинди талитназ удучIвура – кимоно алди ва алдарди. Дюзди гъапиш, кимоно алди кчIихуз лап гъагъиди ву. Думу талитар шахматар уйнамиш апIувалихъди теврира шулу. Фицики кимоно алди вуйи талитнаъ увук кайи гужтIан, уву апIурайи фикир заанди гьисаб апIура.
Эвелиан му спортдиин Бразилия гьюкуматдиъ машгъул хьуз хъюгъну. Хъа ухьухь дидкан инсанариз гьамус аьгъю дубхьна. Учу грепплингдиин машгъул хьуз хъюгъю вахтна, вари республикайиъ спортсменар грепплингдиан кьюб залиътIан вердиш апIурадайи. Тренер Рамиз Ягь’яевдин грепплингдиан вуйи тербияйикк ккади, магьа йиз 9 йис вуйиз. Гъи ихь гьюкуматдин гьарсар спортсмендиз му спортдиин машгъул хьуз ккунди а. Гьаддиз, вари дюн’яйин чемпионатарра Урусатдиъ кIулиъ гъягъюз хъюгъра», – ктибтнийи Аллагьверди Аьшурбеговди.
Аьхиримжи ражари грепплингдиан кIули гъубшу вари дюн’яйин чемпионатдиъ 7-8 кас ихь ватанагьлийир гъалиб гъахьну. Гьадрарин жергейиъ айи Аллагьверди Аьшурбегов, гьаммишан жюрбежюр талитариъ иштирак шули, гъалибвалин йишвар гъадагъури, заан хъуркьувалар улупурайи бай ву. 2015-пи йисхъан мина гъийин йигъаз Дагъустандин, СКФО-йин регионарин, Урусатдин ва вари дюн’яйин жюрбежюр дережйирин талитариъ, чемпионатариъ иштирак шули, думу гьелелиг гъалибвалин йишв гъададабгъди, кьяляхъ гъафундар.
«Сабпи ражари вуди Дагъустандин чемпионатдиъ, 53 килограмм гъагъишин айи спортсменарин арайиъ талитариъ иштирак гъахьунза. Думуган кимоно алди вуйи грепплингдин жюрейиъ кьюбпи йишв гъадабгънийза. Гьаддихъан мина швнуб-саб ражари республикайин чемпионатариъ 2-пи, 3-пи йишварин сагьиб гъахьунза.
Гьамусяаьт узу 75 килограмм гъагъишин айи спортсменарихъди вуйи, гизафси ACB JJ тешкилатди тешкил апIурайи талитариъ иштирак’вал апIураза. Му лап аьхю, хайлин гьюкуматариъ чемпионатар тешкил апIурайи тешкилат ву. Сач 27-пи декабриан 30-пи декабризкьан кIули гъубшу вари дюн’яйин чемпионатдин улихь, регионарин арайиъ вуди, Санкт-Петербург шагьриъ ACB JJ-йи тешкил гъапIу талитариъра узуна йиз гъардши гьарури 4 гъизилин медалар гъадагъунча. Учу кIулиан гьарур ич гъагъишнан категорйириъ кимоно алдира ва алдардира талитариъ гъалиб хьпан кьяляхъ, хъасин абсолютный гъагъишнан категория-йиъра иштирак гъахьунча»,
– гъапнийи Аллагьверди Аьшурбеговди.
Сюгьбатчийи уьмрин чан гележегдин планариканра мялум гъапIнийи. Гьамусяаьтна Аллагьверди ужудар хъуркьувалар улупурайи спортсмен, вари дюн’яйин чемпион вушра, гьелелиг думу Европайин ва Дубайдиъ кIули гъябгъру вари дюн’яйин чемпионатариъ иштирак духьнадар. Гьамусяаьт дугъу чан улихь диврайи асас метлеб – гьадму кьюбби чемпионатариъра гъалиб хьувал ву. Дугъу, думу метлеб кIулиз адабгъбан бадали, чан тренер Рамиз Ягь’яевдихъди гизаф зегьмет зигура. Гъит, ихь ватанагьлийин кIван мурад-метлебар кIулиз удучIври, ва хъа ражари чан метлебарихъ хъуркьну гъафиганра, учу дугъаз редакцияйиз теклиф апIруганси ибшри.
