Учуз, газатдин журналистариз, вуйиш, анжагъ ужудар хабрарикантIан бикIуз ккундайчуз, амма ихь гъийин гьякьикьатдиъ чIуру хабрар, гьядисйир артухъ шула. Гьадрарикан садар – коронавирусдин тIягъвнихъди аьлакьалуди гъюрайи пашман хабрар ву. Гьаддиз газатдин му нумрайин сабпи машнаъра учу, думу урхурайидарихьна илтIикIну, уьзриан арайиз дуфнайи къурхуйиз фикир тувуваликан, жвув уьрхбан бадали, лазим вуйи уьлчмйир кьабул апIуваликан бикIуз мажбур шулачу.
Магьа уьлкейин сагъламвал уьбхбан министерствойира коронавирусдин уьзриан пучIуди ва аьзарлу хьпан лишнар адарди кетIерццнайидариз насигьятар кайи сиягь гьязур дапIна.
ГьацI йис мидиз улихьна коронавирусдиз аькси руб гъивдар, ревакцинация гъапIдар ва уьзриан ктIерццдар лишнар адарди хъана ктIерцциш, дурар тялукь дармнарихьди сагъ апIувал лазим шуладар, гьелбетда чпин яш 60 йистIан артухъ вуйи ва йисариинди сагъ даршулайи уьзрар кайи агьалйир ктарди. Анжагъ, больничный ачмиш дапIну, хулаъ гъузуб ва вахт-вахтарик температура ебцури хьуб лазим ву.
Эгер сагъламвалин гьял пис хьуз хъюбгъиш, температура 38 градустIан за гъабхьиш, ил хътабгъуз гъагъиди вуш, гьялакди медицинайин тяди кюмек тувру гъуллугъназ зенг дапIну ккунду.
Коронавирусдиз аькси рубар диривдар ва думу уьзриан ктIетIерццдар, ОРВИ-йин сабпи лишнар гъахьибси, гьялакди медицинайин тяди кюмек тувру гъуллугъназ зенг дапIну, хулаъ гъузуб лазим ву.
Аьзарлу духьнайи бицIидар мектебдиз вая бицIидарин багъдиз гьаъну ккундар. Абйир-бабари дурар чпи сагъ апIуз хътрюгъди, хъа хулаз духтриз дих дапIну ккунду.
Гьаддихъди сабси, РФ-дин сагъламвал уьбхбан министерствойи маскйир алахьувал, сар-сарин арайиъ йишв ади дийигъувал, кми-кмиди хилар жикIувал ва антисептик ишлетмиш апIувал, сабишв’инди гизаф инсанар уч духьнайи йишварихьна дурушувал тIалаб апIура.
Коронавирусдин «омикрон» штаммди Урусатдиъ ва вари дюн’яйиъ сабишв’инди аьхю кьадар инсанар аьзарлу хьуз гъитну. Аьхиримжи суткайиъ Урусатдиъ 88 816 кас ктIерццбан цIийи дюшюшар ашкар гъапIну. Роспотребнадзорин кIулиъ айи Анна Поповайин гафариинди, аьзарлу хьпан лишнар адарди ктIерццурайидарин кьадар аьхюб ву.
Дагъустандиъ суткайин арайиъ 391 кас аьзарлу гъахьну, 236 аьзарлуйир больницйириъ ккаъну, 3 кас кечмиш гъахьну.
Мициб аьгьвалатнаъ коронавирусдиз аькси рубар йивувал чарасуз вуди рябкъюра. Гъийин йигъаз Урусатдиъ 78 миллионтIан артухъ инсанари коронавирусдиз аькси рубар гъивну. Сабишв’инди вуйи иммунитет 64,4 процент дубхьна.
Уьзрихъди жанлуди женг гъабхбан бадали, Урусатдин Правительствойи регионарин медицинайин цирклиз аьлавади пулин дакьатар деетура. Гьаци, дагъустандин медицинайин цирклиъ лихурайидарин маважибди тувуз 251 миллионтIан артухъ пул жара гъапIну. Уьлкейин премьер-министр Михаил Мишустинди гьаддин гьякьнаан вуйи къарариин къул гъизигну.
Мициб къарар кьабул апIбан себеб йискьубан арайиъ медицинайин гъуллугъчйирин кьадар артухъ хьувалихъди аьлакьалу ву. Мишустиндин гафариз асас вуди, вари уьлкейиъ 11 агъзурихьна духтрар ва 13,5 агъзурихьна медицинайин кьялан гъуллугъчйир артухъ гъахьну.
Кабминдин кIулиъ айири регионарин гьюкмариз медицинайин гъуллугъчйирин маважиб вахтниинди тувбан зиин гюзчивал гъабхуб тIалаб гъапIну.
Мидланра савайи, Урусатдин Правительствойи резервдин фонднаан коронавирусдиз аькси дармнар масу гъадагъуз Дагъустандиз 41 миллион манат жара гъапIну.
Гьаму пулихъ «Молнупиравир», «Сотровимаб», «Тиксагевимаб+ Цилгавимаб», «Ремдесивир» дармнар масу гъадагъбанди ву.
Къайд апIуб лазим вуки, вари регионар коронавирусдиз аькси дармнарихъди тямин апIбан бадали, Урусатдин Правительствойи 20 млрд манат жара гъапIну.
