2020-пи йисан 30-пи майдиъ Дагъустан Республикайиъ 32-пи нумрайиккди пишекарвалин гъазанж гъадабгъбиин налог илипувалин гьякьнаан къанун кьабул гъапIну. Думу къанундиинди, 2020-пи йисан 1-пи июлиан мина республикайиъ жвув жвувахъ лихурайи касари чпи гъадабгъу гъазанждилан налог тувуз хъюгъна. Къанун кьабул апIбан асас метлеб – экономика сирниккан ккадабгъну, дицдар касари ачухъди, къанундиинди ляхин апIбан бадали, ужудар шартIар яратмиш апIувал ву.
Федеральный налогарин гъуллугънан Дагъустан Республикайиъ айи Управле-ниейиан тувнайи мялуматариинди, республикайиъ му жюрейиинди асас вуди ляхин апIурайидар – гизаф инсанар гъахру ва гъагъ гъабхру машинарихъ хъайидар, жвуву гьясил гъапIу мутму масу туврайидар, дишагьлийириз хъайивал апIру салонарин эйсйир ва гьацдар жарадар ву. Гьаци, ккудубшу йисан респуб-ликайиъ жвув жвувахъ лихурайи 37 агъзурна 200 кас официально вуди налоговый гъуллугънан гьисабназ гъадагъну. Думу касари йисандин арайиъ гъадабгъу гъазанждин уьмуми кьадар гьисаб гъапIган, диди 1 миллиардна 663 миллион манат тяйин гъапIну. Гьаддикан 38,6 миллион манат жюрбежюр бюджетариз гъубшну: республикайин бюджетдиз 24,3 миллион манат ва ФОМС-диз – 14,3 миллион манат.
Каспийск шагьрин айитI инсанар гъахру маршруткайихъ хъайи Камил Мягьямедовди му налогдин гьякьнаан чан фикрар узуз ачухъ гъапIнийи.
Дугъан гафариинди, сирниккди лихувалтIан, гьаму жюрейиинди, лазим вуйи налогра бюджетдиз туври, ачухъди лихувал швнуб-саб ражари ужу ву.
«Магьа сачдихъан мина узу тамам апIурайи ляхнихъан бюджетдиз налог тувраза. Пулин кьадар думукьан гизаф дар. Яна, пуз ккунзузузки, ихь кьисмат ихь хил’ан гъябгъидар. Гьаддиз жвув жвувахъ лихурайи касариз варидариз теклиф вуйиз, гучI дарапIди, учву апIурайи ляхин официально вуди налогарин гъуллугънаъ гьисабназ гъадабгъуз гъибтну, марцциди ляхин тамам апIинай, гьадмуган ужуб берекетра хьибди», – гъапну йиз сюгьбатчийи.
Ухьу гьюкмиз тягьнийир йивури шулхьа, пенсйир, пособйир, маважибар цIиб ву кIури, амма налогар тувуз гьялак шуладархьа. Эгер гьюкуматдира, агьалйирира чпин вазифйир намуслуди кIули гъабхуз хъюгъиш, хайлин месэлйир гьял апIуз хьибди.
