Каспийск шагьриъ рас апIуз хъябкьнайи бицIидар бабкан хру хал 7-пи февралиъ ачмиш гъапIну. Магьа душваъ садпи бицIидарра бабкан гъахьну. Дидин гьякьнаан Каспийск шагьрин мэрияйин мялуматарин гъуллугънан кIулиъ айи Луиза Аьгьмедовайи хабар тувну.

 

 

«КIан’ан кIулиз расвалин ляхнар кIули гъуху Каспийск шагьрин бицIидар бабкан хру хулаъ гъи сарпи бицIирра бабкан гъахьну. Медицинайин кюмек тувру идарайиз гъи гвачIнинган дишагьлийир кьабул апIуз хъюгъну. Гьеле мушваъ айидарин кьадар цIиб ву, хъа лап багарихьди думу бицIидар хру дишагьлийири абцIур кIури, умуд кивурхьа», – гъапну Луиза Агьмедовайи.

Дугъан гафариинди, бицIидар бабкан хру хулаъ гъахурайи расвалин ляхнар аьхирихъна хуз республикайин сагъламвал уьбхбан министерствойи гъапIу кюмекну мумкинвал тувну. «Гьамусяаьт Каспийск шагьрин бицIидар бабкан хру хал 90 дишагьли кьабул апIуз гьязур вуйи, бицIир бабкан хру дишагьлийириз ва бабкан гъахьи бицIидариз реанимацияйин хусуси отделение айи шубуб мертебайин дарамат ву», – аьлава гъапIну Л.Аьгьмедовайи.
Дагъустандин сагъламвал уьбхбан министерствойиан туврайи мялуматариинди, лап багарихьди бицIидар бабкан хру хал гьамусдин деврин медицинайин техникайихъдира тямин апIиди.