Магьа Пекиндиъ кьюб гьяфтайиъ кIули гъягъюри гъахьи 2022-пи йисандин кьюрдун Олимпиадайин тамшир ккудукIну. Думу талитарин аьхирихъди аьлакьалу шадлугънан серенжемар Урусатдин «Сабпи канали» прямой эфириан улупнийи.
Серенжем Людвиг ван Бетховендин «Шадвалихьна вуйи ода» мукьмихъди Пекиндин варитIан аьхю милли стадиондилан гъягъюрайи спортсменарин параддилан ккебгънийи. Ихь гьюкуматдин делегацияйин улихьди Урусатдин Олимпийский комитетдин пайдагъ хьади Пекиндиъ шубуб гъизилин медаль гъазанмиш гъапIу, лыжйириинди яртру Александр Большунов гъушнийи. Мидланра гъайри, му спортсменди саб арсран ва саб кемшрин медаларра гъадагъну.
Медаларин кьадарнакан улхуруш, му улупбаан Урусатдин сборный команда 9-пи йишв’ин ал: ихь спортсменари 6 гъизилин, 12 арсран ва 14 кемшрин медалар гъазанмиш гъапIну. Урусатдиз гъизилин медалар, Александр Большуновдилан гъайри, фигурный катаниейиъ гъалиб гъахьи Анна Щербаковайи, дишагьлийир лыжйириинди яртбан эстафетайиъ иштирак гъахьи ихь шубари ва фигурный катаниейиан ихь сборный командайи вари командйирин арайиъ кIули гъушу талитариъ гъазанмиш гъапIну.
Медаларин кьадар жигьатнаан сабпи йишв’ин Норвегия ал. Му гьюкуматдин спортсменари 14 гъизилин медаль гъазанмиш гъапIну. Кьюбпи йишв лайикьлуди Германияйин спортсменарин делегацияйи дибисна. Дурарин сборный командайин вакиларихьан 10 гъизилин медаль гъадагъуз гъабхьну. Дурарин кьяляхъ, 9 гъизилин медаль гъазанмиш дапIну, Китайдин спортсменар дийигъна. Урусатдин улихь гьацира США, Швеция, Австрия, Нидерланды ва Швейцария уьлкйирин командйир хьа.
Шадлугънан серенжемарин дахилнаъди Урусатдин лыжйирин спортдин федерацияйин президент Елена Вяльбейи улихьна йигъан лыжйириинди яртбан марафондиъ гъалибвалар гъадагъу Александр Большуновдиз гъизилин, Иван Якимушкиндиз – арсран ва Симон Крюгериз – кемшрин медалар тувбан церемонияра кIули гъубшнийи.
Гьяйифки, Олимпиадайиъ хоккейиан кIули гъушу талитариъ ихь командайихьан финалиъ Финляндияйин командайиин гъалиб хьуз гъабхьундайи. Дурарин арайиъ гъахьи талитар 2:1 натижайиинди ккудукIну.
Кьюрдун Олимпиадайин нубатнан талитар 2026-пи йисан Италияйин Милан ва Кортинад’Ампеццо шагьрариъ кIули гъягъиди. Олимпиадайин тамшир аьхирихъна гъюбан шадлугънан серенжемариъ Пекиндин мэр Чэнь Цзининди олимпиадайин пайдагъ Милан шагьрин кIулиъ айи Джузеппе Салайихьна ва Картина-д’Ампеццойин кIулиъ айи Джанпьетро Гединайихьна тувнийи.
