Аьхиримжи вахтна Урусатдиъ, ухькан гьарсар шагьид вуйиганси, бязи харижи уьлкйирин терефнаан вуйи илзигувалилан савайи, жвуван ватанагьлийирин жергйириан хатIалу идеологияйин терефкрари арайиз хурайи гъизгъин серенжемарин натижайиъ сикинсуз аьгьвалат арайиз дуфна. Мялум вуйи ва мялум дару себебариан гъи, гьяйифки, рюгьнан кьиматлуваларин зиин мал-мутмуйихьна вуйи невсну агъавал апIуз хъюгъну.

 

Натижайиъ саб жерге жигьилар аьсрариинди абйирихьан наслариз гъузнайи багьалу аьдатарилан цIар алдатуз чалишмиш шула. Дурар, аьхю гъазанжар уч апIбан гъайгъушнаъ ади, гъийин деврин вари мумкинвалар ишлетмиш апIуз гьязур ву, ва му рякъюъ кми-кмиди арайиз гъюрайи дюшюшари дицдар касар пашманра дарапIди гъитрадар. Тялукь аьгьвалатнаъ жямяаьтлугъдин сагъу кьувватарин анжагъ гьяйифар зигури, пашманвалиинди гележегдикан улхури дийигъувал лапра аьхю гъалатI шула.

Гьюрматлу ватанагьлийир, газат урхурайидар, учву гъавриъ гъахьиганси, узу му макьалайиъ жигьилариз хатIа айи уьмрин саб жерге чиркин рякъярикан, йишвариин аргъаж шулайи наслар терроризмдин тясирнахьан уьрхбан метлебниинди гъахурайи серенжемарикан улхидиза.

Аьхиримжи йицIухьуд-къад йисандин арайиъ экстремистарин ва террористарин чиркин идеологияйин тясирнаккди саб жерге ватандашари арайиз хурайи сикинсуз гьяракатари жямяаьтлугъдик гъалабулугъвал кипну. Фукьандар багъри касарихъ мягьрум гъахьну! Гъи Мягьячгъала шагьриъ республикайин МВД-йин улихь ляхнин вазифйир тамам апIурайи вахтна уьмрихъ мягьрум гъахьи гъуллугъчйирин гьюрматназ дивнайи ядигариз кIваъ цIибдикьан ватанпервервалин гьиссар айи, фагьумлу касдихьан сефилдитIан лигуз шулдар.

Мициб аьгьвалатнаъ йишвариин ерли гьюкум тешкил апIурайи жавабдар гъуллугъариз гьял дапIну ккуни месэлйирра артухъ шула. Фунуб дюшюшдиъра ва вахтнара хатIасузвал – гъулай ва ислягь уьмрин эвел ву.

Жямяаьтлугъдин хатIа-суз уьмур тямин апIбан ва мясляаьт уьбхбан бадали, Хив райондин главайин гюзчиваликкди гьюкум тешкил апIурайи жавабдар вакилари му жигьатнаан сикин дарди жюрбежюр уьлчмйир кьабул апIура.

– Райондин аьтрафариин политикайинна агьалйирин саламатвал, мушваъ яшайиш дабалгнайи табасаран ва лезги миллетарин арайиъ дуствалин аьлакьйир уьрхбаз ва дурар мюгькам апIбаз, ва гьацира диндихъди аьлакьалу месэлйириз райондин администрацияйин гъуллугъчйири дикъатлу фикир тувра.
Йишвариин жямяаьтлугъ вакиларихъди мюгькам аьлакьйир уьрхювали аьгьвалат гюзчиваликк гъибтбазра мумкинвал тувра.

Улупнайи вахтназ райондин аьтрафариин уьмуми гьякьикьат фикриз гъадабгъиш, аьгьвалат саламатуб ву.

Шаксуз, му месэла ухьуз варитIан асасуб ва важиблуб вухьуз. Вушра, гьадму саб вахтна уьлкейин гьякьикьат фикриз гъадабгъиган, архаинвализра мюгьлет адар, – къайд апIура Хив райондин главайин хатIасузвалин месэлйириз лигру заместитель Мирзабег Багъичевди.

Дупну ккундуки, мушваъ наслариз гьякьлу гележег яратмиш апIувал хизандин рафтарикан, абйир-бабарикан гизаф асиллу шула. Жикъи вахтна гъизгъинди артмиш духьну, инсанарин уьмриъ кьатI’иди учIву интернет-технологйирин натижайиъ жюрбежюр соцсетариъ жигьилари сикин дарди таниш’валар, гюрюшар гъахувал кьувватнаъ абхъну. Му мяднариъ жавабдар гъуллугъари гюзчивал гъабхура, амма гьелелиг думу ляхин лазим вуйи дережайиз дуфнадар. Хъа экстремистаринна террористарин тереф уьбхюри, къурхулу идеология тарабгъуз ният айи саб жерге касари улупнайи рякъяр сикин дарди ишлетмиш апIурайивали аьгьвалат имбубсан гъизгъин апIура.

Мирзабег Багъичевди субут апIурайиганси, ккудубшу йисан райондиъ террориствалин жюрейин тахсиркарвал арайиз хуз, тешкил апIуз, дурариъ иштирак хьуз гьязур вуйивалин дюшюшар мялум дапIнадар. Райондиъ, жямяаьтлугъдин арайиъ тасдикь дапIну, гьяракатнаъ айи радикальный дестйирра адар.

Улупнайи вахтназ райондиъ, я, террористаринна экстремистарин терефназ илтIикIну, Урусатдин къанундин бинайиинди тялукь жаза дизигну, хулариз хъадакнайи ватандашар, я Сирияйинна Иракдин аьтрафарилан кьяляхъ духнайи баяр-шубар адар. Райондиъ хатIасузвал уьбхювал метлеб вуди, Хив райондин администрацияйиъ тешкил дапIнайи жавабдар комиссияйи террористарин тереф уьбхбан натижайиъ жаза гъизигу касарин багахьлуйирихъди сикин дарди гъаврикк ккаъбан ляхин гъабхура.

– Райондин глава Ярмет Ярметовдин къарариз асас вуди, АТК-йин ляхнин план тартиб дапIнача. Пландиз асас вуди гъахурайи заседанйириъ, йишвариин арайиз дуфнайи аьгьвалатназ кьатI’и кьимат тувну, лазим вуйи уьлчмйир кьабул апIура.

Урусатдин къанундиз аьксиди удучIвну, террориствалин рякъюъ терг гъапIу касарин бицIидарин яшайиш ахтармиш дапIну, дурарихъди йишвариин гъаврикк ккаъбан ляхин гъабхувал кьувватнаъ а. Тялукь хизанар райондиъ кьюб а. Дурарикан гьарсабди аьдати уьмур хъапIра.

Къанун уьбхру гъуллугъарин улупбариз асас вуди, зиихъ къайд дапIнайи хатIалу рякъюн терефкрар духьну, Хив райондиан къанунсузди Сирияйиз душнайи 13 ватандаш гьисабнаъ а. Улупнайи касарин багахьлуйирихъди кми-кмиди гъаврикк ккаъбан гюрюшар гъахура, – гъапну дугъу.

– Жигьилар терроризмдин ва экстремизмдин пис идеологияйихьан уьрхбан рякъ’ан гъахурайи серенжемарикан сарун фу пуз шулу?

– Вари терефариан хатIалу ва гъизгъин девриъ, бегьем аьгъювалар адрувализ лигну, живанариз ужубна харжиб, кIарубна лизиб жара апIувал гъагъиди алабхъура, натижайиъ дурар ухди алдатмишра шула.

Живанариз дюз ислам диндин ччиварикан ва къайдйирикан яркьу мялуматар тувбан бадали, гьар гьяфтайин хамис йигъан ерли ТВ-йиан райондин имамарин советдин председатель Шябан Сялигьовди гюрюшар гъахура. Жямяаьтлугъдин арайиъ гъаврикк ккаъбан ляхин гъабхбаъ ерли СМИ-йин дакьатарира метлеблу йишв дибисна.

Хъа мектебариъ мялимари, йишвариин ерли гьюкмин вакилари, айтIан месэлйириз лигру вакилари му месэлайиан сикин дарди жюрбежюр серенжемар кIули гъахура. Тялукь аьгьвалатнаъ жвуван халкьдин милли аьдатар уьрхбаз артухъ эгьемият тувувалиъ, милли сабвал уьбхювалиъ аьхю мяна а.