Газатдин юбилейихьна
Музыка – му кюгьне заманйирианмина халкьдин кIваан гъюрайи уьмуми ялав ву. Гьаддиз думу искусствойиз аьхю кьувват а. Музыкайин искусствойи халкьдин сурат, милли хасият, уьмрин тарих, дуланажагъдин хусусивал ачухъ апIура.
Музыкайин искусствойин вакили сифте чан халкьдин мукьмарик, хъасин жара халкьарин мукьмарик кайи гьисснан ялавар аьгъю дапIну ккунду. Думу гьисснан ялавнан нур насларихьна рубкьбан бадали, аьхю зигьим, фагьум, ва бажаранвал лазим ву.
Къайд дапIну ккундуки, дюн’яйин вари халкьарин музыкайин сабвал а. Думу сабвал улупбан бадали, инсан гизаф савадлур, чан пишейи- ин юкIв алир духьну ккунду. Улуз гъулан агьали Гьямзат Аьбдулгьялимович Гьямзаев гьацир кас вуди гъахьну.
Гьямзат Гьямзаев 1937-пи йисан Табасаран райондин Улуз гъулаъ бабкан гъахьну. Шил’арин кьялан мектебдиъ урхури имидитIан, думу, аьгъювалар гъадагъбиинси, музыкайиинра юкIв алир вуйи. Дарсарихьан азадди вуйи вахтна живан Гьямзат баяр-шубарихъди музыкайиин машгъул шуйи…
Шил’арин кьялан мектебдиъ 7-пи класс ккудубкIну, Гьямзат Гьямзаевди Дербентдиъ айи педучилищейиъ гъурхнийи, хъа зегьметнан рякъ дугъу Улзарин ккергъбан мектебдиъ бабан чIалнан дарсар кивру мялимди лихувалилан ккебгъру.
1961-пи йисан Лениндин ччвурнахъ хъайи колхозди Улуз гъулаъ культурайин хал тикмиш апIуру, ва душваъ сарпи директорди ляхин апIуз табасаран халкьдин ужур ва адлу кьягьял Гьямзат Гьямзаевдиз теклиф гъапIну. Дугъу чан уьмрин 36 йис гьаму ляхниз бахш апIуру. 1970-пи йисари Гьямзаеварин хизандин ансамбль ади гъабхьну, ва диди республикайин хизанарин ансамбларин арайиъ кIули гъубху конкурсдиъ сабпи йишв гъибисну. Ансамблиъ дурарин аба, дявдин ветеран, инвалид Аьбдулгьялим Гьямзаев, дугъан гъардаш Малларамазан, бай ва риш иштирак шули гъахьну.
Гьямзат Гьямзаев хайлин йисари «Колхоздин уьмур» (гьамусдин «Табасарандин нурар») газатдин корреспондентдира гъилихну.
Бажаранлу музыкантдиз бахш дапIнайи хайлин передачйир табасаран чIалниинди вуйи радиойианра кIули гъухну, гьацира думу телевизорианра гизафбан улупну.
1962-2000-пи йисари Гьямзат Гьямзаевди, Улуз гъулан культурайин Хулан директорин вазифйир тамам апIбахъди сабси, Къужникарин кьялан мектебдиъ музыкайин дарсарра киври гъахну. Дугъу мектебдиъ урхурайидар жюрбежюр мукьмарихъди таниш апIуйи.
Гьямзат Гьямзаев Таба-саран райондиъ ужурсир пишекарвалин музыкант вуди гъахьну, кIури шулу. Думу чан ляхнихьна заан жавабдарвалиинди янашмиш шуйи. Музыкантди симар али чIагъандиин кюгьне мукьмар йивури, хайлин касариз гьаму алатдиин мукьмар йивуз улупну.
Мягьячгъала, Дербент шагьрариъ кIули гъягъру жюрбежюр фестивалариъ, конкурсариъ иштирак шули, Гьямзат Гьямзаевди тариин жюрбежюр миллетарин мукьмар йивбаан 1-пи йишвар гъазанмиш апIури гъахьну, гьадму гьисабнаан Табасаран райондиъ кIули гъягъру фестивалариъра.
Культурайин тажрубалу музыкант, жюрбежюр серенжемарин жанлу иштиракчи хьпаз лигну, Гьямзат Гьямзаев «Гьюрматнан лишан» орден тувбииндира лишанлу гъапIну, дугъаз «Дагъустан Республикайин культурайин лайикьлу гъуллугъчи» кIуру ччвур ва гьацира хайлин гьюрматнан грамотйир ва жара пешкешар тувну.
Гьямзат Гьямзаев чан гъулан жямяаьтлугъ уьмриъ жанлу иштиракчира, ужуб, албагу, халис табасаран хизандин кIулра вуйи.
2007-пи йисан Гьямзат Гьямзаев рягьматдиз гъушну.
