Дагъустандиъ халкьдин шаир Фазу Аьлиевайин 90 йис тамам хьувал къайд апIбаз бахш дапIнайи серенжемар ккергъна. Библиотекйириъ выставкйир ачмиш дапIна, театриъ ва тарихнан паркдиъ серенжемар гъахура.
«Республикайиъ ва дидин гъирагъарихъ жюрбежюр серенжемар ккергъна. Гьаци Расул Гьямзатовдин ччвурнахъ хъайи Милли библиотекайиъ юбилейдиз бахш дапIнайи китабаринна шикларин выставка ачмиш дапIна. Мицдар тялукь выставкйир республикайин шагьрарин ва районарин биб-лиотекйириъра гъахура. Поэзияйин театриъ ва «Урусат – йиз тарих» тарихнан паркдиъ серенжемар кIули гъушну. Гьацира Мягьячгъалайиъ ва Хунзах райондиъ юбилей яркьуди къайд апIбахьна гьязурлугвалар гъахура», – гъапну Дагъустандин культурайин министр Зарема Бутаевайи.
Дугъу къайд гъапIганси, гьамусяаьт шаирин хизандихъди сатIиди вари йисан юбилейихъди аьлакьалуди гъахру серенжемариъ ва соцсетариъ ишлетмиш апIуз юбилейин официальный логотип кадабгъна. Фазу Аьлиевайин вари яратмишар уч дапIнайи, урус чIалниинди вуйи китаб, гьацира кьюб томдикан ибарат вуйи, авар чIалниинди ва шиклар кайи, пешкешди тувуз шлу дугъан гъядягънайи яратмишарин китаб чапдиан адагъбан зиин ляхин гъабхура. Мидланра савайи, Мягьячгъалайиъ сабнуб цIийи мектебдиз ва багъри Хунзах райондиъ уьмуми образованиейин тешкилатдиз Фазу Аьлиевайин ччвур тувбанди ву.
РФ-дин Президентдин багахь хьайи Дагъустандин гьаммишанлугъ вакил Владислав Толстюковдин гафариинди, асас серенжемар Москвайиъ декабрин вазлиъ, Фазу Аьлиева бабкан гъахьи йигъан, литераторарин Кьялан хулариъ кIули гъягъиди.
Юбилей къайд апIру йигъан шаир яшамиш шули гъахьи хуларик кIваин уьбхру тахта ачмиш апIиди, дугъан ядигарихъ кюкйир дивди.
Гьадму йигъан Республи-кайин урус драмайин театрин аьхюну залиъ шадлугънан вечер гъабхуз планламиш дапIна.
Республикайин милли политикайин ва диндин ляхнариз лигру министр Энрик Муслимовдин гафариинди, шаирин яратмишариз бахш дапIнайи юбилейин серенжемар уьлкейин 30-рилан зиина субъектариъ кIули гъягъбанди ву.
Му жигьатнаан йишвариин саб жерге серенжемарра кIули гъахура. Гьаци, Хив райондин бицIидарин яратмишарин Хулаъ урхурайидари шаирин гьюрматназ шиклар зигбан флешмоб мялум дапIна (шиклиъ), хъа гъуларин библиотекйириъ шаирин яратмишарин выставкйир кIули гъахура.
Табасаран райондин культурайин, спортдин ва туризмдин управлениейин кIули айи Аьбдулвагьаб Аьбдуловди туву мялуматариинди, райондин сяргьятаринра ярхи йисан Фазу Аьлиевайин 90 йисандин юбилейихъди аьлакьалу вуди мектебариъ, культурайин хулариъ, библиотекйириъ тялукь серенжемар гъахбанди ву.
КIваин апIурача, улихьнаси республикайин Глава Сергей Меликовди 2022-пи йисан республикайин халкьдин шаир бабкан духьну 90 йис тамам хьувал къайд апIбан гьякьнаан указдиин къул гъизигну. Серенжемар гьязур апIбан бадали, оргкомитет тешкил дапIна.
Фазу Аьлиева – Дагъус-тандин халкьдин шаир ву. Дугъан шиърар дюн’яйин 68 чIалариз илтIикIна. Думу Хунзах райондин Гиничутл гъулаъ бабкан гъахьну.
Поэтесса 84 йисаъ ади, 2016-пи йисан 1-пи январиъ кечмиш гъахьну.
