Гъулан мяишатдин сурсатар гьясил апIурайи, хъа асас вуди тIумутIчивал артмиш апIбиин маракьлу духьнайи, ччим ктабгъру тахиларин культурйир цIийи алаурайи, йиккун жинснан маларин генетика за, хъа мал-къарайиз алафар ва дурарик каърайи мянфяаьтлу шей’ар гьясил апIувалин проектар уьмриз кечирмиш апIурайи касариз грантарин кюмек апIиди. Цци гьаму метлебариз федеральный бюждетдиан гъулан мяишат артмиш апIурайи регионариз 1 миллиард манат жара дапIна.
Тялукь къарарикк Урусатдин Правительствойин пред-седатель Михаил Мишустинди къул зигувалин гьякьнаан Дагъустан Республикайин гъулан мяишатдин ва ипIру-убхъру сурсатарин министерствойин пресс-гъуллугънаан хабар тувра.
Къайд дапIну ккундуки, зиихъ улупнайи гъулан мяишатдин цирклариан грант гъадабгъбан бадали, итIру сурсатар гьясил апIрудар цирклиъ илимдинна техникайин проектдин (КНТП) дахилнаъди дилихну ккунду.
«Ляхнар заан дережайиинди тамам апIбан бадали, грантдин дакьатарихъ лазим вуйи шей’ар ва алатарси, гьацира гъулан мяишатдиъ ишлетмиш апIру техникара масу гъадабгъуз шулу.
Грант жюрейиинди туврайи субсидйирин кюмекниинди биоинженерияйин, генетикайин ва жара тялукь ляхнар кIули гъахуз шулу. Миди гьацира гьясилдрариз, цIийи технологйир ишлетмиш дапIну, харижи уьлкйириан вуйи гьясилдрарихъди талитназ удучIвузра мумкинвал тувди.
Грантар гъадагъу касари натижайиъ, ччим ктабгъру тахиларин культурйирин ихь ватандин тумарин жюрйир, маларин ужудар жинсар ва мал-къарайиз ккабхьру ипIрубдик каърайи мянфяаьтлу шей’ар цIийи алаъну ва тартиб дапIну, ва дурар гьясил апIувал чарасуз лазим ву», – мялум гъапIну министерствойин пресс-гъуллугънаан.
