Нежбрар гьамусяаьт гьяракатниинди хьадукран ляхнариин, хъа асас вуди картфар кивбиин эллешмиш духьна. Дупну ккундуки, ихь республикайин вари муниципалитетариъ, гьарсаб гъулаъ, аьхю мяишатариъси дарди, чпиз ишлетмиш апIуз вушра кIури, картфар урзуру.

 

Дагъустандин гъулан мяишатдин ва ипIру-убхъру сурсатарин министерст-войин пресс-гъуллугънаан «Табасарандин нурар» газатдиз туву мялуматариинди, цци республикайин 20,4 агъзур гектарин хутIлариъ картфар кивуз планламиш дапIна. Картфар урзурайи варитIан гизаф кьадар хутIлар Леваши (3162 гектар), Акъуша (2350 гектар), Хасавюрт (1450 гектар) ва Буйнагъск (1285 гектар) районариъ ерлешмиш духьна. Табасаран ва Хив районарин агьалйирира гьар йисар хайлин хутIлариъ картфар урзура. Цци Табасаран райондиъ 550 гектариъ, хъа Хив райондиъ – 560 гектариъ картфар кивуз планламиш дапIна. Гъийин йигъаз ихь районариъ хутIлар хъаъну, картфар урзуз гьязур дапIна.

Республикайин гъулан мяишатдин ва ипIру-убхъру сурсатарин министрин заместитель Шарип Шариповдин гафариинди, 2021-пи йисаз Урусатдин гъулан мяишатдин министерствойи картфар киврайи хутIларин кьадар артухъ апIбаз чан улихь диву вазифйир ихь республикайи бегьемди тамам гъапIну.

«Гьаму йисанра республикайин КФХ-йириъ ва гъулан мяишатдин тешкилатариъ киврайи картфарин кьадар 20%-тIан артухъ гъапIунча. Му ляхниин эллешмиш духьнайи нежбрарик хъанара атухъси гьевес капIбан бадали, гьюкуматдин терефнаан туврайи кюмекра – ахьрайи харжарин саб пай ккебкуз пулин дакьатар жара апIувал – ишлетмиш апIурача», – гъапну министрин заместители.

Рябкъюрайиганси, ихь республикайиз му мейвайиъ айи мюгьтаж гьубкIбан бадали артухъси картфар гьясил апIуз мумкинвал а. Хъа ихь кьюбиб районарикан кIуруш, душвариъ картфар кивуз гизаф ужудар шараитар а. Гьаз гъи ихь гъуларин агьалйир гьаму ляхниин машгъул духьнадар? Гьаз ихь жилар ичIиди дахьна? Гьюкуматдин терефаан вуйи кюмекра ишлетмиш апIури, ихь районариъ гъулан мяишатдин цирклиъ айи аьгьвалат дигиш шул кIури, умуд кивраза.