Табасаран райондиъ вари халкьарин дишагьлийирин Йигъ къайд гъапIну.
5-пи мартдиъ Табасаран райондин администрацияйин залиъ дишагьлийирин йигъаз бахш дапIнайи серенжемдиз райондин жюрбежюр тешкилатариан са-сар дишагьли дуфнайи. Шадвалин мярака ачмиш апIури, Табасаран райондин главайин заместитель Заур Мусаевди дишагьлийири жямяаьтлугъ уьмриъ бисурайи асас йишвкан, дурари зигурайи зегьметнакан гъапнийи ва уч духьнайидар машкврихъди тебрик гъапIнийи. Чан улхбан аьхириъ дугъу, гизаф йисари райондиъ гъизигу намуслу зегьметназ лигну, саб жерге дишагьлийириз, гьадму гьисабнаан Табасаран райондин ЦРБ-йин бицIидар бабкан хру отделениейин заведующий Зубайдат Аьлигалбицовайиз, Ярс’арин кьялан мектебдиъ урус чIалнанна литературайин дарсар киврайи мялим Махбубе Исмяиловайиз, культурайин, спортдин ва туризмдин управлениейин клубарин ляхнарин пишекар Изафет Рашидовайиз гьюрматнан грамотйир, «Табасаран район» МР-ин глава Мягьямед Къурбановдин ччвурнахъан вуйи сяътар ва кюкйир пешкешди тувнийи.
Серенжемдиъ гьацира саб жерге дишагьлийир гьюрматнан грамот-йир ва кюкйир тувбиинди лишанлу гъапIнийи. Дурарин арайиъ Гурхнаарин кьялан мектебдиъ аьхюну вожатыйди лихурайи Гульян Аьбдуллаева, Ярс’арин кьялан мектебдин ккергъбан классарин мялим Рафият Алхасова, ТинтIарин бицIидарин багъдин заведую-щий Амина Гьясанова, ЦРБ-йин медсестра Анжела Гьяфизова, райондин бицIидарин библиотекайин заведующий Кемале Кельбиева, Табасаран райондин администрацияйин секретарь-машинист Диана Къурбанова, образованиейин управлениейин методист Насима Мутелимова, ЦРБ-йин участокдин педиатр Сабира Рягьимова, райондин администрацияйин бухгалтер Айбика Рашидова, администрацияйин сабпи категорияйин бухгалтер Фариза Рашидова, Хючнаарин сабпи нумрайин лицейдин директорин заместитель Айна Рашидова, райондин главайин секретарь Фарида Султанова, ЦРБ-йин медицинайин тяди кюмекнан отделениейин санитар Халида Шябанова айи.
Украинайиъ дявдин хусуси метлеб айи гьяракат гъябгъюрайивализ лигну, концертдин программа улупундайи. Гьаддиз серенжемдиз цIибтIан инсанар рауч гъапIундайи.
Мициб мани янашмиш’валиин, чпи кIваинди гъитувалиин дишагьлийир гизаф разиди гъузнийи. Гъит дишагьлийирин юкIвар гьарган разиди, чпин веледариин утканди гъузри.
