Гьарсаб девриъ китабди, гьадму гьисабнаан библиотекйири, жямяаьтлугъдин уьмриъ метлеблу роль уйнамиш апIура. Библиотека фунуб жюрейинра китабар, маракьлу журналар, метлеблу мялуматар кайи газатар уьрхюрайи рюгьлувалин хазнахана ву. Тарихнахьна илтIикIну, аьсрарин хъуркьувалариз ва дигиш’валариз дикъатлу фикир тувиш, китаб инсаниятди яратмиш гъапIу аьламатарикан варитIан кьиматлуб вуди гьисаб апIуз шулу. Библиотекйирин метлеблувализ Дмитрий Лихачевди чан «библиотекйир лихури имбукьан гагьди, культура дубгидар» кIуру гафариинди гьякьлу кьиматра тувна.

 

 

Аьхиримжи йицIуд йисандин муддатнаъ Хив райондиъра культурайин циркил хайлин артмиш дубхьна: гизаф гъулариъ клубарин ужагъарихъди библиотекйирин ужагъарра рас, дурар лазим вуйи техникайихъди тямин апIбан уьлчмйир кьабул дапIна. Натижйирра писдар дар. Ккудубшу йисан гъубху ляхнин натижйириз асас вуди, райондин гъулариъ ляхник кайи библиотекйирин филиаларин арайиъ Лик’арин гъулан библиотека варитIан ужубси гьисаб дапIна.

– Библиотекайин ужагъ цIийиб дар, хъа ляхин апIуз лазим вуйи шартIар ачуз. Улупнайи вахтназ гъулан библиотекайиъ 360 китабар урхурайидар а.

Китабарин асас фонд урус ва дагъустан халкьарин чIалариинди дидикIнайи, бицIидариз вуйи ва жюрбежюр чIалариан ихь чIалназ таржума дапIнайи китабар ву. Китабарин кьитвал дици гьисс апIурадарча. Йиз асас месэла – гъийин технологйирихъди гъизгъин девриъ жигьиларин китабарихьна вуйи аьшкь ва маракьар артухъ апIувал вуйиз, – кIура сюгьбатнан эвелиъ Лик’арин библиотекайин кIулиъ айи Адият Рамалдановайи.

– Адият Рамазановна, ХХI аьсир заан технологйирин девир вуйивализ лигну, фунуб мялуматра асас вуди телефонариан, компьютерариан интернетдиъ учIвну адабгъуз шула, гьаддиз жигьиларин китабарихьна вуйи маракьлувал зяиф дубхьна. Мицисдар шартIариъ китабар урхрударихъди ляхин фици албагнава?

– Улихьна йисарихь тевиш, гъи жигьилар, дугъриданра, китабарихьан ярхла духьна. Мициб аьгьвалатну, икибаштIан, сикинсузвалра кипразук. Гъийин йигъаз уьмуми гьисабариинди, узу зиихъра гъапиганси, 360 китабар урхурайидар ачуз. Ляхин асас вуди мектебдихъди сабсира гъабхурача. Айи мумкинвалариз лигну, ляхин мянфяаьтлу ва маракьлу апIбан гъайгъушнаъ учIвну, саб жерге серенжемариъ иштирак шулаза.

Ав, гъийин вари терефариан чиркинвалар гъизгъин духьнайи девриъ китаб саб жюрейинра цIийивалари эвез дарапIрувалин ухькан гьарсар гъавриъ а. Гьаци вушра, месэла гьял апIбан рякъюъ живанар китабариина маракьлу апIбан жигьатнаан зегьмет зигурайидар лап кьит духьна. Тялукь аьгьвалатнаъ ляхин гъабхувал библиотекйириъ лихурайидаризра, гьелбетда, читин ву. Амма дурари чпин вазифйир намуслувалиинди тамам апIуз зегьмет зигура.
Гъабхурайи ляхниз лигну, 2021-пи йисан Хив ра-йондин культурайин кIулиъ айидари Лика гъулан библиотека райондиъ варитIан ужубси гьисаб дапIна, ва думу хъуркьувалариз лигну, библиотека райондин дережайин дипломдиинди лишанлу дапIна.