Ккудубшу йисан Дагъустандиъ Францияйиан ва Германияйиан наркотикар хурайи контрабандайин 3 рякъ ашкар гъапIну. Контрабандайихъди аьлакьалу вуди 12 уголовный дело гъитIирккну, уьлкейин жара регионариан республикайиз наркотикар хурайи 36 канал ашкар гъапIну. Наркотикарихъди аьлакьалу варитIан гизаф тахсиркарвалар Мягьячгъала шагьриъ ашкар дапIна, думу тахсиркарвалари республикайиъ ашкар дапIнайи тахсиркарваларин саки саб пай дибисна.
Гьамцдар улупбар чан улхбаъ ачмиш гъапIну 28-пи мартди РД-йин наркотикариз аькси комиссияйин заседаниейин вахтна РД-йин айтIан ляхнарин министр Аьбдурашид Мягьямедовди.
Министрин гафариинди, гьюкмин органари, къанун уьбхру гъурулушдин гъуллугъчйири, къанунсузди наркотикарихъди алвер апIбан ляхниз аьксивал улупури, 2021-пи йисан 1500-тIан артухъ серенжемар кIули духна. Республикайин образованиейин идарйириъ наркотикар ишлетмиш апIувалихьна хуш’вал айи бицIидар аьгъю апIбан бадали, гьар йисан тестар гъахура. Цци инсандин кIулин маълиз чIуру тясир апIру наркотикар дисувалин 11 ва контрабандайин 6 дюшюш ашкар дапIна. Кьабул апIурайи уьлчмйириз дилигди, ашкар апIурайи тахсиркарвалари республикайиъ къанунсузди наркотикарихъди алвер гъабхувалин ляхин гьяракатнаъ айивал тасдикь апIура. Тахсиркрари республикайин ярхлаъ айи, гъягъюз рякъ хътру аьтрафариъ наркотик ктабгъуз шлу сурсатар урзура. Думу аьгьвалатну гьюкмин ерли органари гъабхурайи ляхнин кагьалвал субут апIура, давам гъапIнийи Аьбдурашид Мягьямедовди
Заседание кIули гъабхурайи Сергей Меликовди 2022-пи йислан ккебгъну, республикайиъ «РД-йиъ къанунсузди наркотикарихъди алвер гъабхувализ аьксивал улупбан, наркоманияйин профилактика, наркотикдикан асиллу духьнайидар сагъ апIбан гьякьнаан» РД-йин гьюкуматдин программа уьмриз кечирмиш апIурайиваликан мялум гъапIнийи. Дагъустандин кIулиъ айири республикайиъ арайиз дуфнайи аьгьвалат къайдайиз гъюбан бадали, наркомания-йихъди женг гъабхбаз ва наркотикарихъди алвер апIбаз аькси профилактикайин серенжемариз артухъди фикир тувну ккуниваликан гъапнийи.
Советарин гьюкум ккадабхъбан кьяляхъ зегьметкеш инсандин ад лап асккан гъапIнийи. Девлетлу касдиз артухъди гьюрмат апIуз хъюгънийи. Хъа гьадму девлет фици гъазанмиш гъапIуб вуш, дидкан фикир апIрударин кьадар лап цIиб ву. Гьаддиз инсанар, фуну рякъяр дагнура, гизаф пул гъазанмиш апIбахъ шула. Инсанар пул гъазанмиш апIбахъ хъергра, веледариз тербия тувуз дурариз вахт гъубзрадар. Натижайиъ фикир тутрувди гъузу набалугъар жюрбежюр чIуру гъиллигънан инсанарихъ, тахсиркарвалин ляхнарихъ хъахьра. Вахт улдубчIвиган, фикир-фагьум бегьем гъабхьиган, дюз рякъюхъна гъюз лап читинди алабхъура.
Абйир-бабарин, мектебдин мялимарин тербияйи, къанун уьбхру органарин, диндин ва жямяаьтлугъ тешкилатарин наркоманияйиз аьксиди гъабхру уртагъ ляхни ужудар натижйирихъна хуб мумкин ву. Гьаддиз ухьу вариди наркоманияйин профилактикайиз фикир тувувал лазим ву.
