Накь, 6-пи майдиъ, Огни шагьриъ Ватандин Аьхю дявдин иштиракчйир вуйи табасаран шаирар Мутlалиб Митаровдин ва Ибрагьим Шагьмардановдин ччвурнахъ хъайи кючйириъ му шаирариз бахш вуйи мармардашдин ядигар гъванар итну ва серенжемар кlули гъушну.  

  

 Ихь халкьдин лайикьлу вакиларихьна аьхю гьюрмат улупурайи му ляхин тешкил гъапlдар — жямяаьтлугъ кас ва меценат Айваз Рамазанов ва «Табасаранар» фонддин руководитель Гюльмягьмад Расулов кlулиъ ади — му фонддин вакилар ву.
Серенжемдиъ Огни шагьрин администрацияйин глава Жалалутдин Аьлирзаев ва дугъан заместителар, М. Митаровдин гъардшин бай физикайинна математикайин илмарин доктор, профессор Ризван Митаров ва шаирин миди вуйи багахьлуйир, И. Шагьмардановдин бай Дагъустан халкьдин шаир Шагьвелед Шагьмарданов ва шаирин миди вуйи багахьлуйир, табасаран халкьдин аьхю писатель, агъсакъал ва жямяаьтлугъ кас Багъир Ражабов, Гьюкуматдин табасаран драмтеатр, Огни шагьрин культурайин отделин гъуллугъчйир, шаирар, мялимар, мектебариъ урхурайидар, юнармейцйир ва ихь халкьдин хайлин жара вакилар иштирак гъахьну.