Гъулан йишвариъ, поселокариъ ва бицIи шагьрариъ ляхин апIру медицинайин хъана артухъ гъуллугъчйириз сабишв’инди вуйи компенсацйир тувбанди ву. «Сагъламвал уьбхювал артмиш апIуб» государствойин программайиъ дидин гьякьнаан дигиш’валар тIаъну.

 

Компенсацйир «Земский доктор» ва «Земский фельдшер» программйирин дахилнаъди тувбанди ву. Гьамус думу программайиъ иштирак’вал апIбан бадали яшамиш хьуз гъулаз удучIвну гъягъювал лазим шуладар. Мидланра савайи, гьюкуматдин терефнаан вуйи кюмек гьацира студентар-медикарихьан ва, медицинайин колледжар ккудукIну, ляхин апIуз чпин гъулариз кьяляхъ гъафи жигьиларихьанра гъадабгъуз шулу.

Духтрариз гьюкуматдин терефнаан — 1 миллион манат, хъа акушеркйиризна медсестрйириз – 500 агъзур манат тувбанди ву. Эгер гъулар ярхла вая рякъ хътру читин йишварихь ерлешмиш духьнаш, компенсацияйин кьадарра за шула: 1 миллионна гьацI – духтрариз, 750 агъзур манат – акушеркйиризна медсестрйириз; Дальний Востокдиз, Крайний Севериз ва Арктикайин йишвариз лихуз гъягъру духтрариз – 2 миллион манат ва 1 миллион манат – акушеркйиризна медсестрйириз.

Компенсация гъадабгъбан бадали, медицинайин гъуллугъчйири хьуд йистIан цIиб дарди гъулаъ ляхин апIбан гьякьнаан сагъ апIру тешкилатдихъди йикьрар йитIну ккунду. Му къарарин кюмекниинди гъулариъ ва ярхла айи районариъ медицинайин гъуллугъчйир гьудруркIрайивалин месэла гьял апIуз хьибди.

РД-йин минздравдира «Земский доктор» ва «Земский фельдшер» программйирин дахилнаъди пишекрариз ляхнариъ дийигъуз теклиф апIура.

Ачухъди вуйи вакансйирин гьякьнаан мялумат ведомствойин сайтдиан гъадабгъуз шулу. Лихру йигъари сяаьт кьюбдиан сяаьт хьубдиз республикайин сагъламвал уьбхбан министерствойин кадрйирин отдели документар кьабул апIура. Программайиъ иштирак’вал апIрударин яшнан ценз адар. Ялгъуз саб вуйи тIалаб – пишекарвал тасдикь апIурайи документар ву: диплом, пишекарвалин сертификат, аккредитацияйин гьякьнаан шагьадатнама.