Майдин 1-диъ, бютюн вари ихь уьлкейиъси, Табасаран райондиъра, Хьадукран ва зегьметнан машквар къайд гъапIну. Хючна гъулаъ Кьалухъ Мирзайин ядигарин багахь хьайи майдандиина райондин жюрбежюр тешкилатариъ, карханйириъ лихурайидар, мектебариъ урхурайидар, райондин гъуларин агьалйир уч гъахьнийи.

 

Серенжем Табасаран райондин образованиейин гъуллугъчйирин райкомдин профсоюздин председатель Сейфудин Керимов удучIвну улхувалилан ккебгънийи. Дугъу, уч духьнайидар нубатнан Хьадукран ва зегьметнан машкврихъди тебрик гъапIнийи. «Улихьна йисари му машквар вари дюн’яйин халкьарин гафнан сабвалин машкварси къайд апIури шуйи, хъа 1992-пи йислан мина Хьадукран ва зегьметнан машкварси къайд апIура. Думу ихь уьлкейин халкьариз, гьадму гьисабнаан Табасаран райондин агьалйиризра, варитIан ккунисдар ва шадлу машкврарикан саб ву. 1-пи майдин машкврихъди тебрик апIури, учвуз жандин сагъ’вал, уьмриъ хушбахтвал ккун апIураза», – гъапнийи Сейфудин Керимовди.

Серенжемдиъ гьацира Дагъустан Республикайин Халкьдин Собраниейин Табасаран райондин терефнаан вуйи депутат Алавудин Мирзабалаев ва Табасаран райондин яшлуйирин Советдин председатель Къумалат Къумалатов удучIвну гъулхнийи. Дурарира уч духьнайидар Хьадукран ва зегьметнан машкврихъди мубарак гъапIнийи, ва Украинайиъ айи ихь эскрар сагъ-саламатди ватандиз хътакувал, дюн’яйиъ ислягьвал, хъа Урусатдиъ халкьарин сабвал хьувал ккун гъапIнийи.

Машквриз уч духьнайидариз райондин культурайин, спортдин ва туризмдин управлениейин пишек-рари, Табасаран райондин гимназияйиъ ва Кьасум Мягьямадовдин ччвурнахъ хъайи искусствйирин мектебдиъ урхурайидари жикъи программайин концертра улупнийи.
Хьадукран ва зегьметнан машквриз тялукь вуйи спортдин талитарра яркьуди кIули гъушнийи.