РД-йин образованиейин ва илимдин министерствойин улихь-кIулихь хьайидари илимдин зиин ляхин апIурайи бажаранлу жигьилариз ва жигьил аьлимариз кюмек тувбан ва дурар артмиш апIбан бадали чпи гъабхурайи ляхникан ктибтну.

 

 

Гьамусяаьт Дагъустандиъ жигьиларин арайиъ илим артмиш апIбан ва дурариз кюмек тувбан зиин ляхин апIурайи илимдинна ахтармиш’валарин 35 институт гьяракатнаъ а, гьадму гьисабнаан кьюб циркиллу институтар (НИИ «Сапфир» ва НИИ «Волна»), инновацияйинна технологияйин шубуб центр, илимдин ахтармишар гъахбан бадали варидихьан ишлетмиш апIуз шлу шубуб центр ва илимдинна ахтармишар гъахбан 27 лаборатория. Гьацира заан удукьувалар айи бицIидарин центр ва Республикайин образованиейин центр артмиш апIури, улихь ккимиди гъюзимбу гележегдиз пише ктабгъбаз диш дапIнайи проектар уьмриз кечирмиш ва бюджетдин йишвар артухъ апIура.

Республикайин образованиейин ва илимдин министрин заместитель Аида Далгатовайи туву мялуматариинди, РАН-дин федеральный ахтармиш’валарин Дагъустандин центриъ жигьиларин кьюб лаборатория ачмиш дапIна. Душваз 20-ртIан артухъ жигьил аьлимар ва ахтармишар гъахурайи аспирантар, ахтармишар гъахурайи инженерар, вузаринна илмин ахтармишар гъахбан академический институтарин профессораринна мялимарин гъурулушарин гъуллугъчйир жалб дапIна.

Республикайиъ экономикайин цирклариан пишекрар гьязур апIбан метлебниинди гъубшу йисан вузарина илимдин тешкилатари аьхю карханйирихъди сатIиди ляхин апIбан гьякьнаан йикьрар гъийитIну.

Мидланра савайи, заан удукьувалар айи жигьил аьлимариз кюмек тувбан бадали, «Жигьил аьлимариз Дагъустан Республикайин Главайин ччвурнахъан вуйи стипендйирин гьякьнаан» положение тартиб дапIна ва думу гьамусяаьт РД-йин Правительствойиз тасдикь апIуз хъадапIна.