Майдин 11-пи йигъан Дагъустандин Глава Сергей Меликов нубатнан ражари Украинайин аьтрафариин гъябгъюрайи хусуси метлеб айи операцияйиъ гъийиху эскрарин хизанарихъди гюрюшмиш гъахьну. Гъийиху эскрарин багахьлуйириз теклиф капIбан кьяляхъ, Сергей Меликовди, гъуллугънан буржи тамам апIури гъийихдариз чан дерин гьюрмат улупури, саб дакьикьайин арайиъ ккебехъну гъузувал мялум гъапIнийи.

 

 

 

Дагъустандин Главайи региондин правительствойиз гъийиху эскрарин бицIидар мектебдиз улихьна вуйи ва образованиейин жара идарйириз кьабул апIбан къайда тартиб апIувал табшурмиш гъапIну.

«Республикайин гъирагъдиъ гъуллугъ гъабхурайи эскрин Дагъустандиъ яшамиш шулайи хпир чан бицIир бицIидарин багъдиз кьабул апIбан бадали илтIикIиган, дугъан тIалаб тамам апIурадар. Халкьдин Собраниейин нубатнан заседаниейиъ думу месэла гьял дапIну, кюмек тувбан уьлчмйир кьабул апIувал ккун апIураза. Ватан уьбхюрайи ясана дявдин операцияйиъ зиян гъабхьи, гъакIи касдин хизандиз саб идарайира кюмек дарапIди гъитну ккундар», – гъапну Сергей Меликовди, гьюкмин ляхин кIулиз адабгъру органарин кIулиъ айидарихьинди илтIикIну.

Дугъу муниципальный образованйирин кIулиъ айидарин улихь зарар гъабхьи гьарсаб хизандиз фикир тувувалин месэла дивна.

«Ичв веледари улупу кьягьялвал гъябкъиган, юкIвар дамагъну ацIру. Дурари, Ватан, гьякь’вал, ухьу ислягьвалиинди яшамиш хьувал бадали, чпин жанар дивну. Региондин вари шагьрарин ва районарин главйирин терефнаан дирбаш баяр вердиш апIбаз чухсагъул, дурар уьмрихъ мягьрум хьувалихъан пашманвал мялум апIураза. Дурар гьарган ихь кIваъ уьрхидихьа!» – гъапну чан улхбаъ Новолак райондин глава Мягьямед-Гьяжи Айдиевди.

Гюрюшдин аьхириъ Сергей Меликов уч духьнайидарин гьарсарин теклифарихъ ва тIалабарихъ хъпехъну.