Игитар кIваълан гьархидархьа!

 

Вахт сабдизра ккилибгудар. Йигъар-йишвар гьялакди ахмиш шулайи нириз ухшар духьна: Урусатдин кьушмари Украинайин аьтрафариин ислягь халкьар нацистарихьан азад апIбан хусуси метлеб айи дявдин операция гъабхуз хъюгъну, магьа юкьуб кIуру ваз гъябгъюра. Думу гьяракатар мукьан вахтназ гьидирфур дупну саринра фикирра дайи, амма…

 

 

Улупнайи гьяракатариъ ихь халкьдин вакилари чпин улихь дивнайи вазифйир намуслувалиинди тамам апIура.
Дявикрарин пис ниятаризна кьас-тариз аьксиди удучIвну, чпин жанар гьяйиф дарапIди, Ватан бадали гъагъи женгариъ иштирак шулайидарин арайиъ табасаран халкьдин дирбаш баяри лайикьлу йишв дибисна. Гьяйифки, накь чпин хизанарин, дустарин арайиъ деъну гъахьи, бахтлу гележегдикан ниятар айи фукьан жигьиларин кьисматарра мушваъ инсафсузди илдицнуш, шагьидар вухьа.
Урусатдин кьушмари хусуси метлеб айи операция ккебгъу вахтна, Ремик Сялигьовдихьан (шиклиъ), сагъламвал мюгькам апIурайивалиан, сифтейин дестейихъди женгназ гъягъюз гъабхьундайи. Амма кьяляхъна, дурушди гъузуз чаз мумкинвал ашра, ватанпервервалин гьиссариккди уьмрин рякъ ккадапIурайи дугъаз чав эскервалин гъуллугъ тамам апIурайи Каспийск шагьриъ сикинвал гъибихъундар.

«Дявдин гьяракатар фициб гъизгъинвалиинди гъягъюраш гьарсаб терефнаан ебхьурайиган узуз, икибаштIан, йиз уьмрин юлдаш йишв’ин гъузну ккундийзуз. Ремик десантвалинна гьюжум апIру кьушмарин дестейин командир вуйи. «Узухь гъуллугъ апIурайи йиз гъарашугъар душмандихъди женгнаъ ади узу мушваъ имбувал узуз гьичра кьабулди адарзуз. Сагъламвализ кьяляхъ гъафиган хъанара лигарза» – тялукь фикрари дугъаз архаинвал тувундайи…20-пи мартдиъ думу чан юлдшарихъди Крымдиз гъитIирхну. Хъайигъан дурар Украинайиъ учIврайиваликан хабар тувнийзуз.Сарун ич аьлакьа гъудубгну…Кьюб гьяфтара бегьем улдубчIвайиз, гъуллугънан буржи тамам апIурайи вахтна чан юлдшар аьжаликкан ккадагъну, учв уьмриан гъушуваликан хажалатнан хабар кубкIнийчуз. Юлдшар душмандин гюллейихьан дюрхну, учв кечмиш гъахьивал улихьна йигъари бязи себебариан Украинайиан кьяляхъ гъафи дугъан гъарашугъарира тасдикь гъапIну. Хайлиндар сакьат духьну хизанарихьна хътакну. Сакьатди вушра думу гъафнийиш…»,

– ктибтура, улариин нивгъ алди, Ремикдин уьмрин юлдаш Гюльбесди.

Ремик Сялигьов 1978-пи йисан Хив райондин Чювекк гъулаъ бабкан гъахьну. Багъри гъулан мектебдиъ уьмуми аьгъювалар гъадагъбан кьяляхъ, думу ДГСА-йин экономикайин факультетдик урхуз кучIвну. Заан аьгъювалариинди университет ккудубкIнушра, дугъу уьмрин рякъюъ Ватандиз вафалувалиинди гъуллугъ апIувал ктабгъну. Урусатдин Яракьлу кьувватарин дахилнаъди Ватандин азадвал, ислягьвал ва сабвал уьрхбан бадали, дугъу баркаллуди сифте Чечендин ругариин, кьяляхъна Дагъустандин сяргьятариин зегьмет зигурайи. Кьюр шуразна бализ уьмрин рякъ ккабалгурайи адашдин кьисмат инсафсуз нацистарин гюллейи кьатI гъапIну.

«Учу 2003-пи йисан октябрь вазлиъ эвленмиш гъахьнийча. Дугъу йиз хатур ккибтну гьичра кIваинди дарзуз: Ремик гьадмукьан хизандин гъайгъу кайир вуйи. Хъа веледарихьна вуйи янашмиш’вал лапра умунуб вуйи. Фунуб месэлара, учуз хабар хьайизра, гьял апIуйи. Узуз ва ич веледариз думу гьар вахтна Игит вуйчуз, игитвалиинди уьмрианра гъушну. Ич веледарра чпин адашдин рюгьнан ватанпервервалин гьиссариккди тербияламиш шлувалиин инанмиш вуза», – давам гъапIну Гюльбес Сялигьовайи.

Чан гъардшин ватанпервервалин кьувватнакан ктибтури, Ремик Сялигьовдин чи Фаизайи давам гъапIу:

«Учу шубур гъардашна кьюр чи вуча. Ремик кьюрпир вуйи. Байвахтналанмина улихь диву кьатI’и месэлйир гьял апIбаъ думу ич гьарсарин кюмекчи вуйи. Адашдина дадайи учуз, байвахтнахъанмина зегьметнахьна жалб апIури, хасиятнан ижмивал, инсандихьна гъадри кади янашмиш хьувал улупнийи. Уьмрин къайдйирикан, читинваларикан улхури, учуз абйир-бабари гьарсаб дюшюшдиъ ватанпервервал, рюгьнан кьувват дюбхну ккуниваликан кIуйи. Чвйир, чйир аьхю гъахьну: гьарсари чан хал гъабалгну, амма думу тербияйин дарсари гьаргандиз уьмриъ лайикьлу йишв гъибисну. Ремикди йиз гафар чан гьунарниинди субутра гъапIну.
Жвуван Ватандиз, ислягь халкьдин гележегдиз мясляаьт тувбан шилнаъди дугъу чан жан намуслувалиинди фида гъапIну».

Ав, ихь дирбаш ватанагьли гьунарлу уьмриан гъушну. Дявдин гъуллугъ гьунарлувалиинди тамам апIури жан диву Ремик Сялигьовдиз улихьна йигъари РФ-дин Президентдин тялукь Указдиинди Кьягьялвалин орден тувну. Орден Каспийск шагьрин мэр Борис Гонцовди Ремикдин хизанарихьна гъурубкьну.

Гъь гьюкуматди мициб гьунарниинди уьмриан гъушу ватандашарин хизанариз лазим вуйи кюмекар тувбан жавадарвал чаина гъадабгъна, амма, къайд апIурза, саб жюрейинра я кюмекнахьан, я орденарихьан жигьил дишагьлийириз уьмрин юлдшар, веледариз – адшар эвез апIуз удубкьруб дар! Гъит ихь жигьилари улупу гьунарар гьавайиди гъюдудучIври! Гъит мициб игитвалиинди уьмриан гъушу ихь кьягьялин веледариз чпин адашди уьмриъ тамам апIуз хътруркьу хъуркьувалар кьисмат ишри! Ремик Исрафиловичдиз женнет кьисмат ибшри, ва саб хизандизра сарун мициб гъамлу хабар ктрубкIри!