2022-пи йисан 29-пи майдиъ Табасаран райондин Хючнаарин сабпи нумрайин лицейдин актовый залиъ «Хядарихьна алдагъурайи гамар» конкурсдин финал кIули гъубшну. Му конкурс райондин культурайинна образованиейин управленйири сатIиди гьар йисан апрелин ва майдин вазариъ тешкил апIурайиб ву. Музыкайиин юкIв али, гьевес кайи бицIидар мектебариъ гизаф ашра, «Хядарихьна алдагъурайи гамар» кIуру конкурс дурарин арайиъ ужударстар, бажаранвал кайидар агбан бадали гъабхурайиб ву.
Цци му серенжемдиъ 150 касдикан ибарат вуйи 33 коллектив иштирак гъахьну, дурарикан 78 кас финализ удучIвну. Конкурс лап маракьлуди кIули гъубшнийи, ва диди Табасарандин жилар бажаранлу бицIидарихъди лап бегьерлудар вуйиб тасдикьра гъапIнийи.
Конкурсдин натижйирикан улхуруш, дурар лап шад апIрудар ву. Ялхъван апIбаан финалиъ аьхю яшнан бицIидарин (15 йистIан артухъ яш дубхьнайидарин) арайиъ 1-пи йишв Табасаран райондин бицIидарин яратмиш’валин Хулан коллективди, 2-пи йишв – мягьрягъарин, хъа 3-пи йишв – зил’арин коллективари гъадагъну.
БицIи яшнан дестейиъ (15 йис хьайиз яш айидарин арайиъ) ялхъван апIбаан 1-пи йишварин сагьибар, барабар кьиматар гъадагъну, сатIиди шубуб коллектив гъахьну – АхьитI гъулан, Кюрягъ гъулан ва Табасаран райондин гимназияйин.
Мяълийир апIбан номинацияйиан аьхю яшнан иштиракчйирин дес-тейиъ 1-пи йишвар кьюр касди гъадагъну – Гурихъ гъул’ан вуйи Саида Гьяжиевайи ва Арак гъул’ан вуйи Айгюн Мягьмирзаевайи, 2-пи йишван сагьиб ТIюрягъ гъул’ан вуйи Темирлан Аьшурялиев гъахьну, 3-пи йишвра кьюр касди чпин арайиъ пай гъапIну – ТинитI гъул’ан вуйи Къизейбат Нурбаевайи ва Ярса гъул’ан вуйи Жасмина Ярягьмедовайи.
БицIи яшнан дестейиъ мяълийир апIбаан 1-пи йишв Дарвагъ гъул’ан вуйи Аьлим Шихбабаевди, 2-пи йишвар ГьепIил гъул’ан вуйи ФатIима ТIеибовайи ва Заира Ражабовайи, хъа 3-пи йишвар хьур касди – ТIаттил гъул’ан вуйи ФатIима Мягьямедялиевайи ва Барият Гьясратовайи, Гелинбатандиан вуйи Пери Исмяиловайи, Ягъдигъ гъул’ан вуйи Раима Мягьмудовайи ва ЦIийи Лижва гъул’ан вуйи Милана Исаевайи гъадагъну.
Музыкайин алатдиин мукьам йивбаан аьхю яшнан дестейиъ шубуб сабпи йишвар тувну: каманчи йивбаан Гелинбатандиан вуйи Исмяил Абумуслимовдиз, чюнгюр йивбаан Кьасум Мягьямадовдин ччвурнахъ хъайи искусствйирин мектебдиан вуйи, гъушади мукьам йивурайи Амина Гьяжиевайиз ва Асият Исаевайиз, каманчи йивбаан Кьасум Мягьямадовдин ччвурнахъ хъайи искусствйирин мектебдиан вуйи Гьядижа Мукаиловайиз.
БицIи яшнан дестейин иштиракчйирин арайиъ кларнет йивбаан Кьасум Мягьямадовдин ччвурнахъ хъайи искусствйирин мектебдиан вуйи Мугьяммад Гьяжикеримов гъалиб гъахьну.
Гьацира Кьасум Мягьямадовдин ччвурнахъ хъайи искусствйирин мектебдиъ урхурайи, исихъ къайд дапIнайи вари касарира заан кьиматар гъадагъну: фортепианойиин мукьам йивбаан С. Рашидовди ва З. Рустамовайи, гъушана гъара йивбаан И. Султановди, каманчи йивбаан А. Селимовайи ва Г.Аслановайи, далдабчйирин дестейиан вуйи Н. Дадашевди, А. Къурбановди, М. Аьбдулжелиловайи, А. Хачмазовайи, А. Рамазановайи, В. Рашидовди ва А. Рашидовди.
Дупну ккундуки, Кьасум Мягьямадовдин ччвурнахъ хъайи искусствйирин мектебдиъ аьгъювалар гъадагъурайи урхурайидари райондин ва республикайин дережайиъди кIули гъуху жюрбежюр конкурсариъра аьхю хъуркьувалар гъазанмиш дапIна, хайлин пешкешар, грамотйир ва дипломар гъадагъна.
Тамашичйириз Кюрягъ гъулан вакиларин «ПсинчI» кIуру ялхъван, ахьтIарин коллективдин «Ургур чвена сар чи» ялхъвнин композиция, Табасаран гимназияйин «Авар» ялхъван, искусствйирин мектебдиан вуйи Амина Гьяжиевайин ва Асият Исаевайин чюнгюр йивувал, гьацира Залина Рустамовайи фортепианойиин гъиву мукьам, Исмяил Абумуслимовдин каманчи йивувал, Аьлим Шихбабаевди, Темирлан Аьшурялиевди, Саида Гьяжиевайи ва Айгюн Мягьмирзаевайи гъапIу мяълийир варитIан кьабул гъахьнийи.
Финализ удучIву вари 78 кас, гьарсаб номинацияйиъ 1-2-3-пи йишвар гъадагъдар, тялукь дипломар, грамотйир ва кьиматлу пешкешариин лишанлу гъапIнийи.
