Ухьуз мялум вуйиганси, Урусатдин Федерацияйи Украинайиъ хусуси метлеб айи дявдин операция гъабхуз хъюгъхъанмина, Америкайи ва Ригъ алабхъру терефнан уьлкйири, Урусатдин политикайихъди вуйи чпин наразивал улупури, ихь уьлкейиин санкцйир иливнийи, ва гьаму себеб вуди, Урусатдиъ жюрбежюр ипIру-убхъру сурсатарин, аптекйириъ айи дармнарин, жюрбежюр шей’арин ва гьацдар жара мутмйирин кьиматар кьюб-шубуб ражари за гъахьнийи. Гьаддихъди сабси асас вуди касибвал кайи ватандашарин яшайишдин аьгьвалат гъагъи гъабхьну.

 

Уьлкейиъ пулин кьимат ужуз, хъа ипIру-убхъру сурсатарин кьиматар за хьувалихъди сабси пенсионерариз ва касибвал кайи ватандашариз читинвалар алахьна. Урусатдин Президент Владимир Путинди мициб аьгьвалатназ фикир тутрувди гъитундар ва пенсияйин пул за апIуз къарар адабгъну. 2022-пи йисан сабпи июндилан башламиш дапIну, пенсионерариз пул, за дапIнайи кьадарра иливну, гъибди.

«2022-пи йисан 1-пи июндилан ккебгъну, ляхин апIури адру ватандашарин пенсия 10 процентдиинди за хьибди. Думу къарар кьабивалиан, жандин сагъ’вал адрувалиан, адаш вая дада дукIну, йитим гъахьи бицIидариз туврайи страховой пенсйирин, гьюкуматдин пенсйирихъди тямин апIбан ва социальный пенсйир гъадагъурайидариз кайиб ву», – мялум гъапIну РФ-дин зегьметнан ва яшайишдин артмиш’валин министерствойиан.

25-пи майдиъ уьлкейин махлукьатлу мялуматарин дакьатари МРОТ (яшамиш хьуз чарасуз лазим вуйи пулси улупнайи кьадар), страховой пенсийир 10 процент за шулайиваликан мялуматар тувнийи.

Урусатдин зегьметнан ва яшайишдин артмиш’валин министр Антон Котяковди хабар тувганси, Урусатдин Пенсйирин фондну 10% за дапIнайи пенсйир тувуз июндин 3-пи йигъхъан мина хъюгъди. Ляхин апIури адру пенсионерарин пенсияйиин иливурайи пулин кьадар кьялан гьисаб 1900 манат хьибди. Уьлкейин 35 миллион ватандашарин пенсияйин кьадар за апIура. Министрин гафариинди, 2022-пи йисан июндин вазлиъ ляхин апIури адру пенсионерарин пенсияйин кьялан кьадар 19360 манат хьибди.