Майдин аьхирариъ Волгоград шагьриъ вари Урусатдин жинснан марччаринна цIигьарин XXII выставка кIули гъубшну. Думу выставкайиъ Дагъустандин 8 муниципалитетдиан (Хунзах, Гуниб, Рутул, Гумбет, Буйнакский, Казбек, Ахцигь ва Тлярата районар) жинснан марччар ва цIигьар уьрхюрайи ва артмиш апIурайи 15 мяишатдин вакилар иштирак гъахьну. Дурари выс-тавкайиз 6 жинснан чарвйирна цIигьар хьади гъушну: Дагъустандин дагълу, Тушинский, Лезгинский, Андийский, Эдильбаевский ва Артлухский меринос жинснан чарвйир.
Дагъустандин гъулан мяишатдин ва ипIру-убхъру сурсатарин министерствойиан тувнайи мялуматариинди, серенжемдиъ вари мяишатарин вакилариз выставкайин дахилнаъди кIули гъушу конференцйириъ, гергми столариъ иштирак хьуз мумкинвал гъабхьну.
4 йигъандин арайиъ кIули гъубху выставкайиъ жинснан марччар ва цIигьар артмиш апIбан месэлйириз бахш дапIнайи швнуб-саб конференц-йирра тешкил гъапIну.
Урусатдин гъулан мяишатдин министерствойин малдарвалинна жинсар артмиш апIбан ляхнариз лигру департаментдин директор Дмитрий Бутусовдинра иштирак’вал ади кIули гъубшу, чарвйирин цирклиз бахш дапIнайи совещаниейиъ Дагъустан Республикайин делегацияйин дахилнаъди РД-йин Правительствойин председателин заместитель Нариман АьбдулмутIалибов, ихь республикайин гъулан мяишатдин ва ипIру-убхъру сурсатарин министр Мухтарбий Аджеков ва гьацира республикайин малдарвалин мяишатарин кIулиъ айи касар ва аьлимар иштирак гъахьну.
Совещаниейиъ Мухтарбий Аджековди малдарвалин цирклиан республикайиъ гъабхурайи ляхникан ктибтну.
«Гьамусяаьт республикайиъ 4,5 миллион марччарна цIигьар а. 2021-пи ва 2022-пи йисарин ччилар апIру кампанияйин натижйириинди, мяишатари 98% дул гъадабгъну. Йигълан-йигъаз региондиъ гьаму деврин тIалабариз жаваб туврайи мал-къара убккру, гьаддихъди сабси дидиз ипIруб ккабхьру йишварра тешкил апIура
Мялум вуйиганси, гъи Дагъустандин чарвйирин йиккуз, вари Урусатдиъси, харижи уьлкйириъра муштарйир а. Гьаци вуйивализ лигну, гьар йисан тоннариинди чарвйирин йикк жара гьюкуматариз экспортдиз гьапIрача», – гъапну министри.
Мухтарбий Аджековди Дагъу-стандин кафари терефнаъ мал-къара утIубккру 200 агъзур гектарин чIурар ишлетмиш дарапIди дирчнайиваликан ва думу месэла гьяракатниинди гьял дапIну ккуниваликанра гъапну.
24-пи майдиан 28-пи майдизкьан давам гъабхьи выставкайин серенжемариъ Урусатдин регионариан дуфнайи эспертари, аьдат вуйиганси, духнайи марччар-цIигьаригъян ужударсдар гъядягъну. Натижайиъ дагъустандин мяишатариз 26 медаль тувну. Гьадрарикан 11 гъизилиндар, 9 арсрандар ва 6 кемш-риндар ву. Гъазанмиш гъапIу медаларин кьадарниинди вари Урусатдин жинснан марччаринна цIигьарин XXII выставкайиъ Дагъустанди 1-пи йишв гъибисну.
