Гъубшу гьяфтайиъ Дагъустан Республикайин экологияйинна табиаьтдин девлетарин министр Ибрагьим Ибрагьимовди Дагъустандин РИА-йин конференцйир гъахру залиъ республикайин журналистарихъди асас вуди хъархъсарин, гъумран ва гъвандин карьерариз ва вари экологияйин месэлйириз бахш дапIнайи пресс-конференция гъубхну.
Конференция ачмиш апIури ва журналистарин суалариз жавабар туври, дугъу республикайин уткан табиаьтдикан ва гьял дарапIди гъузнайи читин месэлйирикан гьапнийи. Гьадрарикан саб – зирзибилихъди аьлакьалу месэла ву. Министри гъапиганси, 2019-пи йисан аьхирариз рес-публикайин гьарсаб муниципалитетдиъ зирзибил дабхьру йишвар гьязур дапIнади ккундийи, аммаки думу ляхин тамам гъапIундар. Яна 2019-пи йисан кьабул гъапIу, зирзибил гъабхбан къайдайиан гьякьнаан вуйи къанундиинди ляхин апIуз хъюгъруган, республика хъархъсар тартиб апIру заводар дивбахьна гьязурди дайи. Дицдар заводар адрувализ лигну, республикайиъ къанунсузди лихурайи урсларин кьадарра кам дубхьну ккудубкIурадар. Министри къайд гъапIганси, региондин экологияйинна табиаьтдин девлетарин министерствойин пишекрари кIулди сачдин йисан ва ццийин 1-пи квартализкьан гъуху ахтармиш’валарин натижайиъ республикайин аьтрафариин къанунсузди лихурайи 86 урсал терг гъапIну. Му ляхин гьелелиг давам шули ими.
«Гьамусяаьт республикайиъ лицензия ади кьюб заводди хъархъсар тартиб апIура. Республикайин Глава Сергей Меликовди регион 3 зонайиз пай дапIна. Гьарсаб зонайиъ хъархъсар гьясил апIру заводарси, думу хъархъсар жюрйириз жара апIру заводарра 2024-пи йисан аьхириз яратмиш апIуз ва 2025-пи йисхъан тина ляхник кирчуз пландик ка», – гъапну министри.
Ибрагьим Ибрагьимовди туву мялуматариинди, Кьибла Дагъустандин терефназди дициб завод Дербент райондин аьтрафариин, Дербент ва Табасаран районарин арайиъ яратмиш апIиди. Дина вари Кьибла Дагъустандин муниципалитетариан хъархъсар хиди.
Мидланра гъайри, Ибра-гьим Ибрагьимовди республикайиъ айи гъумран ва гъвандин карьерарин гьякьнаанра мялуматар тувнийи. Ихь кьюбиб районариъ айи карьерарин гьякьнаан йиз суалназ жаваб вуди дугъу гъапиганси, Табасаран ва Хив районариъ айи гъвандин карьерарин уьмуми кьадар 27 а. Къанун чIур апIури ляхин апIурайивализ лигну, Табасаран райондиъ айи 15 карьерарикан 7-дин лицензйирин гьяракат, апIурайи ляхин дюз къайдайиз хайиз, дебккна, хъа саб карьерин лицензия батIул дапIна. Хъа Хив райондиъ айи 12 карьерикан анжагъ 1 карьерин лицензиятIан вахтназ вуди дебккнадар. Имбудари вариди чпин ляхин лицензияйин йикьрарин тIалабариз асас вуди давам апIура.
