Коронавирус ачмиш гъабхьихъанмина, республикайин гьюкмин кIулиъ айидари думу тарабгъувалин улихьишв бисуз жюрбежюр уьлчмйир кьабул апIури, ихь яшайишдин аьдати саягъ дючIюбгъну гъабхьнийи. Аьхиримжи вахтна тIягъюн зяиф гъабхьнушра, варидарихьан бегьемди «ил хътабгъуз» шуладайи. Ва магьа коронавирусдин къурхулувал имдрувал офицально вуди тасдикь гъапIну.

 

8-пи июндиъ «Дагъустан» РИА-йин конференцйир гъахру залиъ РД-йин сагъламвал уьбхбан министр Татьяна Бяляева ва Роспотребнадзорин РД-йиъ айи управлениейин кIулиъ айи Николай Павлов республикайин журналистарихъди гюрюшмиш гъахьну. Гюрюш тешкил апIбан себеб – республикайиъ коронавирусдин инфекция тарабгъбаз аьксиди медицинайин маскйир алахьувалин къайда вахтназ вуди дебккрайивалин гьякьнаан мялум апIувал вуйи.

«Гьаму йисан 15-пи гьяфтайихъанмина хъюгъну, коронавирусдиан аьзарлу шулайидарин кьадар лап ис гъабхьну. Суткайиъ – 3-5 кас. Гъи Республикайин инфекц-йирин уьзрарин центриъ коронавирусдихъди аьзарлу гъахьидариз жара дапIнайидар анжагъ 25 койка ву. Амма, гьаддихъди сабси, дидиз аькси рубар йивувал дебккуз хай шулдар. Дидихьна варидин сабишв’инди вуйи иммунитет хьпан бадали, рубар гъиву касарин кьадар 1,8 миллионкьан дубхьну ккунду. Гъи дурарин кьадар 1,5 миллиондихьнатIан дар. Мидланра савайи, гьар гьацI йисак ревакцинацияра дубхну ккунду. Лазим вуйи кьадар рубар республикайиъ а, гьаддиз, улупнайи вахт улдубчIвнуш, рубар йивуз гъювал ккун апIурача», – гъапну РД-йин сагъламвал уьбхбан министр Татьяна Бяляевайи.

Николай Павловдин гафариинди, «Спутник V» руб гъивдариз вари халкьарин сертификат тувра, ва дурарихьан саб манигъ’валра адарди харижи уьлкйириз гъягъюз шулу. «Гьамусяаьт республикайин бязи агьал-йир Саудовский Аравияйиз гьяждиз гъягъюз гьязур шула. Улупнайи вакцинйирин рубар гъивундарш, дурариз душваз рякъ хъябкьюб мумкин ву», — гъапну дугъу.
Аьхиримжи вахтна бязи уьлкйириъ ачмиш дубхьнайи «маймнарин битIар» уьзрихъди ва гьацира багахь йисари хъана жара тIягъвнар ачмиш хьувалин къурхулувал айивалин гьякьнаан (жюрбюжюр харижи уьлкйириъ, гьадму гьисабнаан ихь гъвалахъ хъайи Грузияйиъра, США-йин «илмин ахтармишар гъахру» лабораторйир айивал тасдикь гъабхьиган) улхбар гъягъюрайивалихъди аьлакьалу вуди, журналистари республикайин кIулин санитарвалин духт-риз, гележегдиъ ухьу сарун фтихьна гьязур духьну ккунду кIури, суал тувнийи.
Николай Павловдин гафариинди, саб вирус тIанкь гъапIиган, дидин ерина жараб гъюри аьдат ву, анжагъ думу фукьан зегьерлуб шулуш, улигь ккимиди пуб читин ву.
«Ав, гьамусяаьт вари дюн’яйиъ дицдар хатIалу уьзрар арайиз гъюбан мумкинвал айи йишвар гизаф а. Гьамусяаьт 30-тIан артухъ уьлкйириъ 950-тIан артухъ инсанарик маймнарин битIар кIуру уьзур кайивал тасдикь дубхьна. Аьдати битIариз ухшар айи думу уьзур тарабгъувалин улихьишв бисури, ихь уьлкейин сяргьятариин ижми уьлчмйир кьабул апIура», – гъапну Николай Павловди.

Къайд апIуб лазим вуки, йислан-йисаз ихь республикайиз гъюрайи туристарин кьадар артухъ шула. Бязи улупбариинди, цци дурарин кьадар 1 миллионна хьудварж агъзурилан 3 миллиондихьна хьуб мумкин ву. Саб терефнаан диди, республикайин бюджетдинси, алверчивалиин машгъул духьнайи ватанагьлийиринра гъазанжар артухъ хьпаз тясир апIура, хъа тму терефнаан – коронавирусдин тягъвнихьан гучI гьабхънайи инсанарик гъалабулугъ’валра кипра.
Николай Павловди гьацира ихь региондиъ хицIарикан кубчIвру конго-крымский геморрагический лихорадка уьзур тарабгъувалин къурху айиваликанра гъапнийи. Аьхиримжи вазариъ республикайин агьал-йир гьаму уьзриан аьзарлу хьувалин швнуб-саб дюшюш ашкар дапIна. Му месэлайин гьякьнаан тялукь инструкцйир кади турагентствйириз мялуматарин кагъзар хъадаъна, муниципалитетарин кIулиъ айидариз табшуругъар тувна.