16-пи июлиъ Мягьячгъалайин Пушкиндин ччвурнахъ хъайи кючейиъна «СтIал Сулеймандин ччвурхъ хъайи сквер» шагьрин паркдиъ, Дагъустандин Глава Сергей Меликовдин табшуругъниинди, республикайин гъулан мяишатдиъ гьясил апIурайи ипIру-убхъру сурсатарин ярмарка ва «Дагъустандин гъизилин мишмиш» ччвур тувнайи III Республикайин фестиваль сатIиди кIули гъягъиди.
Мидин гьякьнаан РД-йин Правительствойин пресс-гъуллугънаан хабар тувра.
Гьаму киш йигъан республикайин меркездиъ кIулиъ гъягъру гъулан мяишатдин цирклин серенжемарин гьякьнаан улхури, респуб-ликайин Правительствойин председателин заместитель Нариман АьбдулмутIалибовди къайд гъапIганси, республикайиъ гьаму йисандин арайиъ швнуб-саб ражари гъулан мяишатдиъ гьясил апIурайи сурсатарин ярмаркйир кIули духна.
«Му жюрейин, янаки агьалйириз файда кайи, серенжемар гъахували гъулан мяишатдин сурсат гьясил апIурайи нежбрариз артухъси муштарйир агуз, хъа агьалйириз исккан кьиматназ ужуб ерийин сурсатар масу гъадагъуз мумкинвал тувра. Кьюбби серенжемарра ухьу заан дережайиъди духну ккунду, фицики дурариъ иштирак хьуз республикайиз дуфнайи туристарра гъиди, ва дурарин, ихь республикайиканси, мушваъ гьясил апIурайи сурсатарикан вуйи фикирра ужуб шлуганси дапIну ккунду», – гъапну Нариман АьбдулмутIалибовди
Правительствойин пресс-гъуллугънаан тувнайи мялуматариинди, тешкил апIурайи серенжемариъ республикайин муниципалитетарин мяишатарра иштирак хьиди, душваъ милли хурагарра гьязур апIиди, халкьдин сяняаьткарвалин шей’арин выс-тавкара хьибди. Сад йигъан сатIиди кIули гъягъру кьюбиб серенжемарра, Дагъустандин машгьур артистар иштирак духьну, концерт улупбиинди аьхи-рихъна гъиди.
Гьаддихъди сабси, дагъустандин мишмишариз муштарйир гъидихъну.
БицIидариз ипIруб гьязур апIру машгьур бренд «ФрутоНяняйи» гергебилин мишмишарихьна чан маракьлувал улупну. Гьаддин гьякьнаан республикайин Минсельхозпродди мялум апIура.
«Мишмишарин багъларихъди девлетлу вуйи Гергебил районди 3,5 агъзур тонна йимишар гьясил апIбанди ву. Экология жигьатнаан марцци сурсат Дагъустанди Урусатдин вари регионариз хътапIура», – кIура мялуматнаъ.
Цци республикайиъ мишмишарин ужуб бегьер уч апIура – 35 тоннайи-хьна. Гьаддихъди аьлакьалу вуди РД-йин Правительствойи думу чIур дархьиди уьбхбан ва масу тувбан бадали, гъулан мяишатдин зегьметкешариз кюмек тувбан уьлчмйир кьабул апIура.
