Дагъустандиъ сабпиб вуди 15 МВт-дин кьувват айи ва ригъдиинди либхру электростанция Южно-Сухокумскдиъ ачмиш гъапIну. Му аьхю проектдин инвестор ва генеральный подрядчик «Хевел» компания ву. ЦIийи объект сетарин инфраструктурайик кибтIуз «Кафари Кавказ Россети» компанияйин пишекрари кюмек гъапIну.

Электростанция ачмиш апIуз буйругъ думу серенжемдиъ иштирак шулайи РД-йин премьер-министр Аьбдулмуслим Аьбдулмуслимовди тувну. Дугъу къайд гъапIганси, му объект ачмиш апIувал ихь региондиз тарихи гьядиса ву. Фицики аьхиримжи ражари вуди Дагъустан Республикайин аьтрафариин энергетикайин цирклиъ цIийи кьувватар 8 йис мидиз улихьна тIаънийи.

«Гизаф харжар тIалаб апIурайивализ лигну, штун бинайиинди энергия арайиз хувалин цирклин проектар хъяркьбанди гъахьнийи. Гьаддиз республикайин улихь-кIулихь хьайидари ригъдинна микIлан бинайиинди энергия арайиз хувал армиш апIуз планламиш гъапIнийи. Республика артмиш шули, харж апIурайи электроэнергияйин кьадар йислан-йисаз артухъ шула. Гьаддиз думу гьясил апIбан цIийи кьувватар тIаували Дагъустандин энергетикайин гъурулушдин ихтибарвал тямин апIура», – гъапну премьери.

Муниципальный гьюкмари электростанция тикмиш апIуз 40 гектарин жил жара гъапIну. Дидин кьувват Гунибдин ГЭС-динубсиб ву, ва диди электроэнергия ишлетмиш апIбаан Южно-Сухокумск шагьриз айибсиб игьтияж бегьемди тямин апIиди.
Станция ригъдин 40 агъзур модуликан ибарат шула, ва диди 30 гектарин жил дибисна. Му проект уьмриз кечирмиш апIуз жалб гъапIу инвестицйирин кьадар 1,5 млрд манат ву. Диди гьясил апIбанди вуйи электроэнергияйин кьадар – саб сяаьтнаъ 20 млн кВт ву. Натижайиъ табиаьтдиз гатIабхьурайи углекислый газдин кьадарра йискьубаъ 7 агъзур тоннайиинди кам хьибди.

Гьацира, му проект уьмриз кечирмиш апIури, лихру 60 йишв ачмиш гъапIнийи, хъа гьаммишандиз вуйидар – 13. Компанияйи гележегдиъ ихь рес-публикайиъ ригъдиинди электроэнергия гьясил апIувал артмиш апIбанди ву.