Хизан – ихь уьмриъ варитIан гирами, багьалу савкьат ву. Ужуб, албагу хизан айи кас бахтавар ву, хъа бахтлу хизан кьюр касди яратмиш апIуру. Гьелбетда, хизандиъ гъайгъушнарра цIиб шулдар. Бахтлу ва аьхю хизанар ихь арайиъра цIиб адар.
Табасаран райондин Улуз гъулан агьалйир вуйи Ражаб ва Гюльханум Ражабоварин хизанра гьацдар хизанарикан гьисаб апIуз шулу.
Гъубшу гьяфтайиъ, Хизандин, ккунивалин ва вафалувалин йигъан улихь, Табасаран райондин главайин кабинетдиъ Улуз гъул’ан вуйи Гюльханум Ражабова «Дадавалин ордендиинди» лишанлу гъапIну.
Дагъустан Республикайин Главайин тIалабниинди, Гюльханум Ражабова «Дадавалин орден» наградайихъди лишанлу апIбан бадали, Табасаран райондиз РД-йин Главайин багахь бицIидарин ихтиярар уьрхбаан вари ихтиярар айи вакил Марина Ежова гъафнийи. Думу серенжемдиъ гьацира Табасаран райондин глава Мягьямед Къурбанов, дугъан заместителар, Къужникарин глава Несредин Къурбанов ва жара касар иштирак гъахьнийи.
Дупну ккундуки, «Дадавалин орден» РД-йин гьюкуматдин награда ву, думу, дадавалин ад за, гизаф бицIидар уьрхру хизанар артухъ апIбан бадали, адабгънайиб ву. ЙицIур вая артухъ бицIидар дюрхну, дурар арайиз адагъу дишагьлийир «Дадавалин ордендиинди» лишанлу апIуру.
Гюльханум Мягьмудовна заан награда тувбахъди сифте Табасаран райондин глава Мягьямед Къурбановди мубарак гъапIнийи: «Гьюрматлу Гюльханум Мягьмудовна. Уву нумуналу дагълу дишагьли-дада, зегьметкеш хпир вуди лайикьлу уьмур хъапIунва. Уьмриъ гизаф зегьмет зигувал, гьадмукьан читинвалариан удучIвувалра алабхъунвуз. 10 бицIир дюрхну, дурар арайиз адагъувал – зурба, гизаф даллай хъайи ляхин ву. Совет гьюкуматдин вахтна Табасаран райондиъ 10 ва артухъ бицIидар айи 800-дихьна хизанар айи. Ихь дадйир думу вахтна бицIидар уьрхюзра, ляхин апIузра хъуркьрийи. Учу – гьамусдин наслин вакилари дицдар дадйириинди дамагъ апIурача. Ичв дадавалин зегьметназ аьхю чухсагъул мялум апIурача, ичв зегьмет гъийин наслариз нумунади улупуз шулу», – гъапнийи райондин главайи.
РД-йин Главайин терефнаан райондз дуфнайи Марина Ежовайи, Гюльханум Мягьмудовнайихьна илтIикIну, къайд гъапIнийи: «Дада хьувал – му башкъа гьюрмат гъазанмиш апIувал ву, хъа вари хизандилан ккебгъру, ужуб тербия тувувалилан. Табасаран район гизаф бицIидар айи хизанарихъди, хялар кьабул апIувалиинди машгьур ву, мушваъ ачухъ юкIвар айи гьюрматлу инсанар яшамиш шула. Гьелбетда, гьамусдин хизанаризра гизаф бицIидар апIуз ккунди ашул, амма дурариз бицIидар уьрхбан читинваларихьан гучIури а. Ихь вазифа – гизаф бицIидар айи хизанариз вари терефарихъанди кюмек апIувал ву. Гъи гьюкуматдира дицдар хизанариз кюмек апIура. Гизаф бицIидар айи хизанар артухъ хьпаз гьаддиканра кюмек хьувал мумкин ву. Ухьу Гюльханум Мягьмудовнайиз жандин сагъ’вал, хушбахтвал, чан багахьлуйирихъди яшамиш хьуз ярхи уьмур ккун апIурахьа».
Гюрюшдиъ гъябгъюрайи сюгьбатнаъ Гюльханум Ражабовайи чакан ва чан уьмрикан ктибтнийи. Думу 1948-пи йисан 25-пи апрелиъ Улуз гъулаъ гизаф бицIидар айи хизандиъ бабкан гъахьну. Дугъу гъулан мектебдиъ 5-пи класс ккудубкIну. Гьадму вахтнан бицIидаризси, дугъазра бицIидимиди хизандиъ зегьмет зигувал алабхъну. Дишагьлийи швнуд-сад йисан Къужникарин совхоздиъ ляхин апIури гъахьну, хъасин 30 йисахьнакьан халачйирин фабрикайиъ.
Чан жилир Ражаб Ражабовдихъди дурари 10 бицIир (7 байна 3 риш) дюрхну, арайиз адагъну. Гьамусяаьт дурар Урусатдин ва Дагъустандин жюрбежюр йишвариъ яшамиш шула. Гюльханум бабаз 20 худул ва 10 гудул а. Гъи думу бицIину балихъдина швушвахъди яшамиш шула, дурари Гюльханум баб аьхю гьюрмат ади уьрхюра. Чан яшназ дилигди, Гюльханум бабу хулан, бахчйирин ляхнар, гьацира худлар, гудлар уьрхюзра кюмекар апIура.
Учв кIваин дапIну, гьюкуматдин гьамциб заан пешкешнахъди лишанлу апIбаз Гюльханум бабура чан терефнаан Мягьямед Къурбановдиз ва Марина Ежовайиз чухсагъул гъапнийи.
Гележегдиъра увуз жандин сагъ’вал, хизандихьан аьхю гьюрмат кьисмат ишри, гьюрматлу Гюльханум баб!
Шиклиъ: Г.Ражабовайиз «Дадавалин орден» тувбан герен.
