Дербент шагьриъ, Хизандин, ккунивалин ва вафалувалин йигъаз тялукь вуди, гизаф веледарин дада Хирда Мирзаханова «Дадавалин орден» тувбиинди лишанлу гъапIну. 81 йисаъ айи Хирда бабаз му орден тувуз Дагъустандин Главайин багахь бицIидарин ихтиярар уьрхбаан вари ихтиярар айи вакил Марина Ежова гъафну. Марина Ежовайи ва Дербентдин мэр Рустамбег Пирмягьямедовди Хирда бабаз машквар ва гьюкуматдин терефнаан тувнайи аьхю пешкеш мубарак гъапIну.
Хирда ва дугъан уьмрин юлдаш Тураб Мирзахановар Дербентдиз 1962-пи йисан ЧвулатI гъул’ан удучIвну гъафидар ву. Дурари 8 велед (4 бай ва 4 риш) аьхю ва тербияламиш гъапIну. Тураб Аьдилович шагьрин тикилишар дивбан цирклиъ заан гъуллугъариин гъахьи, аьхю гьюрмат айи ва гизаф ярар-дустар хъайи кас вуди гъахьну. Гьяйифки, думу дюн’яйилан душну, гьамус къад йис дубхьна. Хирда бабаз гьамусяаьт 18 худул ва 19 гудул а.
«Уву учуз дагъустан дишагьлийирикан варитIан заан нумуна вучуз», – гъапну Марина Ежовайи бабаз. Ав, думу яшарин ихь бабарин ва дадйирин гьарсаб гаф ва гьарсаб ляхин жигьил наслиз дарсарди улупуз лайикь ву. Узу бабан сану риш, Дербентдин 2-пи гимназияйин мялим Сефижат Имамовайихьан, дугъаз Хирда бабан хасиятнан лишнарикан фунудар жигьил наслин дишагьлийирик духьну ккундийиш, гьерхунза. «Сяргьят адру ккунивал. Думу вардихьна багърийирихьнасдар рафтар айир ва инсанар гизаф ккунир ву, – гъапну Сефижат Турабовнайи. – Ляхнихьнара дугъан гьациб хътIатIабццру ккунивал а. Думу халачйир урхури, хизандин гъайгъушнаъ, гьюкуматдин ляхниъ гьаммишан зегьметнаъ гъахьи дишагьли ву. Гьамусра, чаинди вуш, дугъаз ляхнар апIуз, учуз вардиз кюмек апIуз ккунду. Хъа багахь хьайи швушву, тму веледари дерккри шулуча. Вушра бицIиб-аьхюб бистниъ, хулаъ саб фициб-вушра ляхин дарапIри дугъаз кьара гъюрдар… Ав, жигьилариз аьхю наслин дишагьлийирин ужувлан, зегьметкеш’валин, хялариз гизаф шад вуйивалин лишнар сабпи нубатнаан нумуна гъахьиш, ужу ву».
Ихь газатдин терефнаанра Хирда Гьяжимягьямедовнайиз чан орден мубарак апIурача! Гъит дугъаз, дугъан веледариз хъанара аьхю ужувлар-бахтар дикIри! Бабан худлар ва гудлар гизаф ишри, дугъаз цIудлар ва чан аьхю бахтлу хизандин арайиъ варж йис къайд апIру йигъар рякъри!
Шиклиъ: Дербентдин мэр Р. Пирмягьямедовди Хирда Мирзахановайиз орден мубарак апIури.
