Гьаму йисан аьхирариз Урусатдиъ медицинайин страхованиейин цифровой полис тIапIбанди ву. Гьаддин гьякьнаан ОМС-дин федеральный фондну мялум апIура.

 

РФ-йин саб жерге къанунчивалин актариъ дигиш’валар тIаъбан гьякьнаан ФЗ-йиз асас вуди, ОМС-дин цифровой полис гьаму йисан 1-пи декабрихъан гьяракатнаъ хьибди. Думу, цифровой полис, ккудубкIну гьязурди а, ва диди мялуматар уьрхбанна хатIасузвалин вари тIалабар ижмишнаан гьисабназ гъадагъна. Цифровой полис официально вуди тIапIхъанмина дидин эйсйирихьан чпин хусусиятвал тямин апIурайи документарихъди пулсузди вуйи медицинайин кюмек гъадабгъуз хьибди.

КIваин апIурача, 2021-пи йисан ноябрин аьхирариъ кIули гъубшу Вариурусатдин конгрессдиъ РФ-йин сагъламвал уьбхбан министр Михаил Мурашкойи ОМС-дин полис цифровой жюрейин хьибди ва думу, бицIир бабкан духьну, урусатдин ватандаш’вал тяйин гъапIубси, дишлади яратмиш хьибди кIури, мялум гъапIнийи. Мидланра савайи, полис гьацира ЗАГС-дин реестриъ тялукь бикIбар вая страхование апIбан аьрза ачмиш хьубси, дишлади яратмиш хьибди.

Цифровой полис тIапIували агьалйириз аьхю гъулайвал хибди, фицики духтрихьна гъягъру вахтна полис хулаъ гьархбан мумкинвал гъубзидар, талон абцIруган, нубатнахъ дийигъбан вахтра кам хьибди ва жара йишваз душнайи вахтна медицинайин кюмек лазим гъабхьиш, думу саб читинвалра адарди гъадабгъуз хьибди. Гъийин девриъ лап гьялакди улихь гъягъюрайи технологйири инсанарин яшайишдиз йигълан-йигъаз артухъ-артухъ гъулайвалар хура.