Улихьна йигъари Дагъустандин Глава Сергей Меликов вари Урусатдин олимпиадйирин гъалибчйирихъди ва пешкешнан йишвар гъадагъдарихъди, ЕГЭ-йиъ 100 балл гъазанмиш гъапIу выпускникарихъди ва дурарин мялимарихъди гюрюшмиш гъахьну.
«Гъябгъюрайи йис республикайиъ Образованиейин йисси къайд апIурахьа. Ва учву иллагьки гьаму вахтна гъадагъу хъуркьувалариин рази дархьиди гъузуз шулдар. Гъи ичв улихь жара месэлйир ва рякъяр дийигъна. Учву дурарихьна гьязурди ади ккунду. Ичв наслин кьатI’и мумкинвалар гьаддиъ аки – учвхьан азадди фикир апIуз ва ичв фикрарин кюмекниинди аьдати дару месэлйир ачухъ апIуз шулучвхьан.
Гьарсаб гъалибвал хайлин гъалатIарин, шак адруваларин, ягъурсузваларин кьяляхъ гъюру. ВаритIан асасуб – саб вахтнара кьяляхъ мизиганай, хилар ис мапIанай. Илмиъ, искусствойиъ, спортдиъ жвуван мумкинваларихъ ва удукьуваларихъ хъугъну ккунду.
Учу, аьхюдар, ичв багахь хьидича, ихь Ватан бадали сатIиди зегьмет зигурхьа. Узу ичв гьарсарин хъуркьуваларихъ хъугъраза. Учвуз цIийи гъалибвалар ва заан мумкинвалар кьисмат ишри!» – гъапну Сергей Меликовди, выпускникарихьна илтIикIури.
Сергей Меликовди гюрюшдин аьхириъ выпускникарин суалариз жавабар тувну ва дурарин гележегдин планарикан гьерхну. Аьхюнуб пай выпускникари уьлкейин улихь хьайи вузариъ урхуз чпиз аьшкь айиваликан гъапнийи. Республикайин Главайи, жигьиларин урхбахьна айи кьадарсуз аьхю аьшкьниин рази духьну, гъадагъу аьгъювалар дурари Дагъустандин хайирназ ишлетмиш апIрувалик чан миж кивну.
Гюрюш выпускникариз ва дурар гьязур гъапIу мялимариз 100 агъзур манатдин сертификатар тувбиинди ккудубкIну.
Гьяйифки, 100 балл гъадабгъу выпускникарин арайиъ я Табасаран, я Хив райондин выпускникар адайи.
Хив райондин образованиейин отделиан туву мялуматариинди, райондиъ кьюр выпускник шубариз 100 балл гъадагъуз бицIи гам гьубкIундар. Дурар Ашагъа АрхъитI гъулан мектеб ккудубкIу Аида Муслимова ва Марият Бугатилова ву. Аидайи урус чIалнаан – 94 балл, хъа Мариятди обществознаниейиан – 98 балл гъазанмиш гъапIну.
Табасаран райондиъра 100 баллихьна лап багахь гъахьи выпускникар а. Райондин образованиейин управление-йин кIулиъ айирин заместитель Багъиш Аьгьмедовди туву мялуматариинди, Ярса гъулан мектеб ккудубкIу Шевле Нурбалаевайи урус чIалнаан 91 балл, СиртIич гъулан мектебдин вакил Аминат Аскендеровайи урус чIалнаан 94 балл, Къужник гъулан мектебдиъ урхури гъахьи Амина Селимовайи урус чIалнаан 94 балл, ГьепIил гъулан мектебдин вакил Амина Аьбдуллаевайи урус чIалнаан 96 балл, Табасаран райондин гимназияйин выпускник Расул Гьяжимутелимовди математикайиан 90 балл, ва гьадму гимназияйин сарсана выпускник Руслан Исмяиловди обществознаниейиан 92 балл гъазанмиш гъапIну.
Гъит ихь выпускникариз ягъурлу рякъ ва хъана заан хъуркьувалар кьисмат ишри.
