Гьар йисан июлин 26-ди Дагъустан Республикайиъ Конституцияйин йигъ къаршуламиш апIури шулу. Районарин ва шагьрарин активарихъди гюрюшар тешкил апIувал, чпин цирклиъ хъуркьувалар гъазанмиш гъапIу касар гьюкуматдин пешкешарихъди лишанлу апIувал, культурайин идарйириъ, мектебариъ машквриз бахш вуйи йигъинжагъар гъахувал – му ляхнари, гьелбетки, республикайин Асас къанундихьна вуйи агьалйирин рафтар ижми апIура, жямяаьтлугъ уьмриъ гизаф аьхю мяна айи документдин эгьемият ачмиш апIуз ва Дагъустанди аьхирижи сумчIур йисан ккадапIу тарихи рякъ улупуз кюмек тувру…
Аьдат вуйиси, РД-йин Конституцияйин йигъ ццира Табасаран ва Хив районариъ яркьуди къайд гъапIну.
Гизаф йисари гъизигу зегьмет лишанлу гъапIну
23-пи июлиъ Табасаран райондин администрация-йин актовый залиъ РД-йин Конституцияйин йигъаз бахш вуйи шадвалин серенжем кIули гъубшну. Дина райцентриъ айи тешкилатариъ, идарйириъ лихурайидариз, гъуларин советарин главйириз, гъуларин культурайин хуларин ва мектебарин директорариз, улихь йисари Табасаран район артмиш хьпак чпин лайикьлу пай киву яшлу касариз дих гъапIнийи. Серенжемдиъ гьацира РД-йин энергетикайинна тарифарин министр Ризван Мурадовра иштирак гъахьнийи.
Шадлугънан мярака Табасаран райондин культурайин, спортдин ва туризмдин отделин директор Аьбдулвагьаб Аьбдуловди кIули гъубхнийи.
Уч духьнайидар республикайин Конституцияйин йигъахъди Табасаран райондин глава Мягьямед Къурбановди тебрик гъапIнийи. «Дагъустан Республикайин Конституция – республикайин асас къанун ву. Диди Урусатдин Федерацияйин дахилнаъди ихь республикайин гьюкумчивал яратмиш апIбаъ политикайинна ихтиярарин мюгькам бина арайиз гъабхну, Дагъустандин халкьарин сабвал, тарихи аьдатар ва миллетарин башкъавалар мюгькам гъапIну», – ашкар гъапIнийи дугъу конституцияйин важиблу роль.
Чан улхбан аьхириъ райондин кIулиъ айири уьлкейиъ гьамусяаьт арайиз дуфнайи аьгьвалатра кIваин гъапIнийи. «Гъи, гьамциб читин вахтна, Украинайиъ гъябгъюрайи дявдин хусуси метлеб айи операцияйиъ иштирак шулайи ихь жигьил эскрариз чпин буржи тамам дапIну, сагъ-саламатди чпин хизанарихьна кьяляхъ хътакуб ккун апIурахьа», – натижа гъивнийи Мягьямед Къурбановди.
Дагъустан Республикайин энергетикайин ва тарифарин министр Ризван Мурадовдира ватанагьлийир республикайин Правительствойин терефнаан машкврин йигъахъди мубарак гъапIнийи.
Къайд апIурайи машкврин тарихнакан чан улхбаъ Табасаран райондин депутатарин собраниейин председатель Иса Исаевди ктибтнийи.
Мяракайиъ гьацира Табасаран райондин Жямяаьтлугъ палатайин председатель Аьлимирза Гьясанов, зегьметнан ветеран Тажудин Мягьрамов, яшлуйирин советдин председатель Къумалат Къумалатов ва жара касар удучIвну гъулхнийи. Дурари чпин улхбариъ конституция Ватандин ва агьалйирин гъуллугънаъ дубхьну ккуниваликан, хъа халкьди конституция дюбхну ккуниваликан гъапнийи.
Хъасин Табасаран райондин главайи чпин цирклариъ заан хъуркьувалар гъазанмиш гъапIу касар гьюрматнан грамотйирихъди лишанлу гъапIнийи. Му йигъан гизаф йисари гъизигу намуслу зегьмет райондин администрацияйин терефнаан къайд гъапIдарин арайиъ Гьяжириза Аьбдуризаев, Аьбдуриза Аьлиев, Бесият Гюльмягьямедова, Жя-фар Жяфаров, Аьбду-керим Керимов, Къумалат Къумалатов, Тажудин Мягьрамов, Аьбдулкьадир Межидов, Кьасум Рамазанов, Гъяйфулла Шябанов, Ха-дижат Къулиева, Мутелим Нурялиев, Тельман Мамаев айи.
Райондин Жямяаьтлугъ палатайин председатель Аьлимирза Гьясанов «Табасаран райондин улихь заан хъуркьувалар гъадагъбаз лигну» медалихъди лишанлу гъапIну.
Уч духьнайидариз райондин ЦБС-дин пишекрари, Хючнаарин сабпи нумрайин лицейдиъ ва Хючнаарин кьюбпи нумрайин мектебдиъ урхурайидари Дагъустандикан, дагълу уьлкейин халкьарин дустваликан шиърар гъурхнийи. Хъасин райондин культурайин хулан артистари уч духьнайидариз марагълу концерт улупнийи.
Ватанпервервалин гьиссар айи инсанар хьуз буржлу вухьа…
Хив райондиъ машкврин гъаншариъди райондин библиотечный гъурулушдиз дахил шулайи идарйириъ ва бицIидарин багъариъ Конституцияйин йигъаз тялукь вуйи серенжемар тешкил гъапIнийи.
Узуз асас вуди Хив гъулан «Ромашка» ччвур тувнайи бицIидарин багъдиъ кIули гъубшу мяракайикан ктибтуз ккундузуз. Серенжем Урусатдин Федерацияйин ва Дагъустан Республикайин гимнарилан ккебгънийи. Тербиячйир Эллада Мердановайи ва Саяд Везировайи пайдгъар, цалин газатар, Дагъустандикан вуйи китабарин гъварчар, республикайин гьяйбатлу йишварин шиклар, дагълу уьлкейиъ яшамиш шулайи халкьарин ккурттарикан ва хурагарикан вуйи презентация гьязур гъапIнийи. Дидлан савайи, бицIидариз дурари РД-йин Конституцияйиан маддйир гъурхнийи ва дурарин мяна ачухъ гъапIнийи, Р. Гьямзатовдин «Йиз Дагъустан» кIуру эсерин бинайиин алди адабгънайи кинофильм улупнийи ва гьацира, аьхюр-бицIирихьна вуйи гьякь-гьюрматнакан эл-аьдалатнакан вуйи абйирин гафар ва мисалар ишлетмиш апIури, тербияйин сюгьбат гъубхнийи.
БицIидарра йигъинжагъдиъ жанлуди иштирак гъахьнийи. Чпихьна улихь ккимиди тувнайи лезги, табасаран ва урус чIалариинди Дагъустандикан вуйи шиърар ва мяълир гъурхнийи, милли ялхъвнар гъапIнийи.
Серенжемдин натижйир йивури, бицIидарин багъдин заведующий Бесхалум Абакаровайи тербиячйириз ва дурари тербия туврайи бицIидариз чухсагъул мялум гъапIнийи.
Урус шаир Николай Некрасовдин машгьур гафар кIваина духну, дугъу чан улхуб мяналу келимайиинди ккудубкIнийи: «Шаирар хьуз ухьу буржлу дархьа, хъа намуслувалиинди, ватандихъан юкIв убгру ва лазим вуйи йишвахь ифдин цIадал гьяйиф дарапIру ватанпервервалин гьиссар айи инсанар хьуз ухьу буржлу вухьа!»
