26-пи июлиъ Дагъустан Республикайин Конституцияйин йигъахъди аьлакьалу вуди, Мягьячгъалайиъ айи Урусатдин телевидениейинна радиойин гъурулушдин (РТРС) Дагъустандин филиалин 182 метрин ягълишин али телевышка 16 агъзур рангариинди кабалгну.
Телевышка жюрбежюр рангарин аквариинди кабалгбан шадлугънан серенжемдиъ РТРС-дин кIулин идарайин ва дидин Дагъустандиъ айи филиалин вакилар, Мягьячгъала шагьрин кIулиъ айидар ва хайлин жара касар иштирак гъахьнийи.
Му гьядисайихъди республикайин агьалйир тебрик апIури, РТРС-дин генеральный директор Андрей Романченкойи къайд гъапIганси, Дагъустандин аьтрафариин 164 РТРС-дин объектар ал, ва Урусатдин гьич саб жара региондиъ му кьадар объектар адар.
«РТРС-дин Дагъустандиъ айи филиал Урусатдин телевидениейинна радиойин аьхю гъурулушарикан саб ву. Думу жюрбежюр себерариан – дагълу республика вуйивалиан, саспи йишвариз гъягъюз рякъяр ва аквар адрувалиан ва гь.ж. – чан вахтна лап гъагъиди, гизаф читинвалар ккагъри, яратмиш гъапIуб ву. Гьаци вушра гъи республикайиъ гьаму деврин цифровой гъурулуш тешкил дапIна ва мушваъ 20 цифровой каналарра лихура. Учура му филиалин артмиш’валин зиин дикъатлу гюзчивал гъабхурача. Дидлан савайи, Дагъустандиъ, телерадиойин гъурулушдин чIур гъахьи ляхнар рас апIру центрра а, думу саб Дагъустандин ваъ, хъа вари СКФО-йин республикйирин арайиъ айи центр ву», – гъапнийи РТРС-дин генеральный директори.
Гьамусдихъантина жюрбежюр машкврарин вахтна вая республикайиъ асас мяна айи гьядисйир шлуган, гьаму вышкайиин рангариинди вуйи шоу улупуз мумкинвал а. Гьаддихъди сабси, региондиъ артмиш шулайи туризмдизра телевышкайи эгьемият тувди, фицики йишвандин вахтна инсанар гьяйран шлубси рангариинди кабалгнайи вышкайи туристарра чахьна жалб апIиди.
РТРС-дин Дагъустандиъ айи филиалин директор Альфред Акимовди мялум гъапIганси, гьамусдихъантина му вышкайиин жюрбежюр тебрикар ва реклама тувуз ккунидариз андроиддин бинайиин али телефонариан аьрза тувуз шлу прриложениера тартиб дапIна. Гьадму приложениейиъ йикьрар йитIбан кьяляхъ, 9200 светодиодный чирагъар ва 44 прожектор али вышкайин 16 метрин медиаэкрандиин видеоролик жюрейиинди вая жабгъурайи цIарниинди тувнайи тебрик вая реклама удубчIвиди. Мициб мумкинвал гьелелиг Урусатдин гьич саб шагьриъкьан адар.
