Июлин 26-пи йигъан ихь республикайи чан асас милли машквар – Дагъустандин Конституцияйин йигъ къайд гъапIну. Му йигъан республикайин шагьрариъ ва саки вари районариъ рягьимлувалин концертар, акцйир, шадлугънан серенжемар кIули гъушну. Мидланна гъайри, аьдат вуйиганси Дагъустандин Главайи экономикайиъ, культурайиъ, илимдиъ, спортдиъ, образованиейиъ, сагъламвалиъ ва жара цирклариъ, баркаллу зегьмет зигури, заан хъуркьувалар гъадагъу дагъустанлуйир (40 кас) гьюкуматдин терефнаан пешкешар тувбиинди лишанлу гъапIну. Сабпи нубатнаъди Сергей Меликовди ватандин улихь чпин буржи игитвалиинди гъабхурайи Росгвардияйин Дагъустандин управлениейин ва Мягьячгъала шагьрин милли гвардияйин гъуллугъчйириз ва эскрариз «Кьягьялвалин» орден ва «Дирбаш’вал улупбаз лигну» медалар тувну.
Республикайин кIулиъ айири уч духьнайидариз Дагъустандин Конституцияйин йигъ тебрик гъапIну. «Гъи ухьу республикайин Асас къанун кьабул апIбан йигъ къайд апIурахьа. Конституцияйи республикайин гьюкум мюгькам апIура, ихь жямяаьтлугъдин бинайин багьалу савкьатарин, кюгьне культурйирин, аьдатарин ва чIаларин хусусиваларин ихтиярар, региондиъ ислягьвал, дуствал ва сабвал уьбхюра», – гъапну Сергей Меликовди.
Дагъустандин Главайин гафариинди, пешкешар гъадагъурайи дагъустанлуйир Ватандин хъуркьуваларик лайикьлу пай киври гъахьи ватандашарин насил ву. «Гъи гьаму залиъ айи инсанарин арайиъ Дагъустандин артмиш’валик ва дидин мублагъ’валик чпин гьар йигъандин баркаллу зегьметниинди лайикьлу пай киву инсанар а», – къайд гъапIну Сергей Меликовди.
Му гафарин кьяляхъ республикайин Главайи гьюкуматдин пешкешар тувну. Гьадму гьисабнаан РФ-дин Государственный Думайин депутат Сайгидпаша Умахановдиз Амет-Хан Султандин ччвурнахъан вуйи «Жигьилариз ватанпервер тербия тувбаз лигну» медаль, ДГУ-йин тарихдин факультетдин декан Булат Баширов ва Республикайин клинический больницайин гемодиализдин отделение-йин заведующий ПатIиматзагьра Гьяжиевайиз «РД-йин улихь гъазанмиш гъапIу хъуркьувалариз лигну» орденар, республикайин жямяаьтлугъ вакил Шуми Шабатаевдиз ва Гьямид Гьямидовдин ччвурнахъ хъайи Олимпийский резервдин спортдин мектебдин тренер Шамиль Гереевдиз Дагъустандин артмиш’валик лайикьлу пай кивбаз лигну – медалар, меценат Жигерхан Сулеймановдиз Дагъустан республикайин Главайин ччвурнахъан вуйи сяаьт тувнийи.
С.Меликовди «Ихтиярарин къайда мюгькам апIбаъ хъуркьувалар улупбаз лигну» Росгвардияйин медалиинди 2018-пи йисан Къизлар шагьриъ килисайиз ибадат апIуз дуфнайидариин террорист алархьу вахтна, дугъахъди женг гъубху Дагъустандин Росгвардияйин управлениейин гъуллугъчйир лишанлу гъапIну.
Конституцияйин йигъан РД-йин лайикьлу гъуллугъчи ччвурар тувдарин арайиъ духтрар, мялимар, энергетикар, промышленностдин, культурайин ва жара циркларин вакилар айи. Республикайин лайикьлу мялимдин ччвурназ Рутул райондин математикайин дарс кивру мялим Зинигар Мирзабеговара (шиклиъ) лайикьлу гъахьну. Дагъахъди Сергей Меликов Рутул райондиз гъушу вахтна таниш гъахьнийи. Думуган мялимди учв 45 йисан дагълу гъулан мектебдиъ лихурайиваликан ктибтнийи.
Хъа республикайин Глава Хунзах райондин центральный больницайиз гъушу вахтна душваъ 60 йисан сагъламвалин цирклиъ лихурайи духтир Абу Адиевдихъди таниш гъахьнийи. Духтурра Дагъустандин Главайи Чухсагъул мялум апIурайи тафавутлу гъахну.
Главайихьан гьюрматнан гафар ва пешкешар Мягьямедхан Гьяжимягьямедовдира гъадагъну. Му касди цIиб улихьнаси Авар Койсу нириъ ккахьрайи туристар аьжаликкан ккадагъну. Сергей Меликовди Гьяжимягьямедовдин игитваликан улхури, дугъу учв гьякьлу дагъустан жвиси улупувал, чаз айи хатIайихьан гучI дарапIди, жара инсанариз кюмекназ гъушувал къайд гъапIнийи.
Бабвалин орден хизандин аьлакьйир мюгькамди уьрхювализ лигну, Хунзах райондиан вуйи Аминат Гераевайиз тувну. Му дишагьлийи 10 бицIир тербияламиш гъапIну, дурарикан 5 бицIир йитимар вуйи.
Му йигъан Сергей Меликовди чпин зегьметниинди ва баркаллу ляхнариинди инсанариз ва ватандиз кюмек туврайи хайлин дагъустанлуйирин ччвурар ктухну.
«Узу, Дагъустандин маракьар уьрхюри баркаллу зегьмет зигурайи гьарсар дагъустанлуйиз чухсагъул мялум апIураза», – гъапну республикайин кIулиъ айири.
Серенжемдиъ Украинайиъ хусуси метлеб айи дявдин операцияйиъ иштирак шулайи, ихь уьлкейин ва респуб-ликайин хатIасузвал игитвалиинди уьбхюрайи дагъустанлуйиризра асас фикир тувнийи.
«КIваин апIуз ккундузуз, гъи ухьу читин вахтна гюрюшмиш шулахьа. Ихь гьюкуматдин маракьар уьрхюри, Украинайиъ хусуси метлеб айи дявдин операция гъябгъюра. Гьяйифки, Ватанди чпин улихь дивнайи вазифа тамам апIурайи вахтна, чпин жанар дивдарин арайиъ Дагъустандин баярра хайлиндар а», – гъапну Сергей Меликовди ва эскрарин багахьлуйириз башсагълувал ккун апIури, гъийихдар саб дакьикьайи ккебехъну гъузувалиинди кIваин уьрхюз теклиф дивну.
Аьхириъ Сергей Меликовди вари дагъустанлуйир Дагъустан Республикайин Конституцияйин йигъахъди тебрик апIури, варидариз ислягьвал ва хушбахтлувал, багъри республика ва Урусат артмиш апIбак пай кивуз заан хъуркьувалар ва мумкинвалар ккун гъапIну.
