Рякъ-хул хътарди, гъягъюз-гъюз читинвал кайи гъулан йишвариъ дуланмиш шулайи дагъустанлуйирихьан гьамусдихъантина почтайиъди дармнариз заказ тувуз шулу.

 

 

«Урусатдин почтайи» Дагъустандиъ му жюрейин сервис тIапIну. Гьамусдихъантина рецепт адарди гъадагъуз шлу дармнар дагълу ярхла гъуларин агьалйириз почтайиъди чпин хуларизкьан хуз хьибди. Гьаддин гьякьнаан идарайин Дагъустандиъ айи управлениейин пресс-гъуллугъну мялум гъапIну.
Фармацевтикайин сабпи партнер вуди «Здравсити» кIуру компания удубчIвну.

«Хусуси температурайин шартIариъ уьрхювалин тIалаблувал адру, рецепт адарди гъадагъру дармнар гьамус почтайиъди хътауз хьибди. Гьаци, компанияйин zdravcity.ru сайтдиъ дармнар гъадагъруган, анжагъ жвуван хусуси адрес улупубтIан лазим шулдар. Посылка почтайин отделениейиз гъафиган, почтальонди дидин эйсийихъди аьлакьа дебккру ва думу хулаз хьади гъюру», – кIура почтайин мялуматнаъ.
Му цIийи сервис уьлкейин 77 региондиъ «Урусатдин почтайин» 1200 отделенйириъ гьяракатнаъ а.

«Урусатдин 70 агъзур аптекйирикан анжагъ 14%-тIан ярхла дагълу гъулариъ ерлешмиш духьнадар. Гъягъюз-гъюз читинвал кайи йишвариъ дуланмиш шулайи 38 миллион агьалйириз думу кьадар, гьелбетда, гьубкIрадар. «Урусатдин почтайихьан» гъулан вари йишвариъ отделенйир айивализ ва почтальондиз дармнар хулаз гъахуз мукинвал айивализ лигну, му месэла гьял апIуз шулу», – гъапну «Урусатдин почтайин» «Дармнар» бизнесдин кIулиъ айи Владимир Виноградовди.