27-пи августдиъ Дербент шагьрин Н. Гянжевийин ччвурнахъ хъайи паркдиъ Урусатдин Президент В. В. Путиндин, Урусатдин Армияйин ва Донбассдин агьалйирин тереф уьбхбаз бахш вуйи митинг-концерт кIули гъубшну. Дидиъ дербентлуйир ва гъирагъарилан дуфнайидар, волонтёрарин тешкилатар, кадетарин корпус, юнармейцйир, студентар ва хайлин жара инсанар иштирак гъахьну. Митинг РФ-дин гимн тамам апIбалан ва фонтандин штук гьюкуматдин къудратлуваликан вуйи видео улупбалан ккебгънийи.
Концерт кIули гъабхурайи, митингдиз уч духьнайидарихьна гьамцдар гафариинди илтIикIнийи: «Гъи мушвахь сабхилди кюгьне Дербентдин агьалйири ва хялари – ухьу ижмишнаан ихь эскрарихъанди, дурариз чпин хушниинди кюмек туврайидарихъанди, ихь Ватандин маракьар уьрхюрайи вари касарихъанди вуйиваликан кIурахьа. Гьарсаб гьунарнан, гьарсаб игитвалин ляхнин кьувват аьдати инсанарилан, аьдати жигьиларилан – Ватандиз вафалу ихь ватанагьлийирилан ву. Урусат – зурба ва мюгькам уьлке ву, ва ухьу вари гъи ихь уьлкейиз, гьякьлувализ даягъ хьувал гизаф важиблу ву, гьаз гъапиш кьувват дюзвалиъ а!»
Уч духьнайидарин улихь Дербентдин главайин вазифйир вахтназди тамам апIурайи Аьли Кьурбанов, шагьрин ветеранарин Советдин председатель Гьяжимурад Гьяжимурадов, афгъан ветеранарин председателин заместитель Низами Хамутаев, шагьрин депутатарин собраниейин председатель Гьясан Мирзоев, Дербентдин, Дагъ. Огнийин ва Дербент райондин военный комиссар Агъаси Бабаев, Дербентдин имамарин Советдин председатель Аьбдулла Маликов ва жарадар удучIвну гъулхну.
«Дагъустан халкь гьамусдизра гьарган Урусатдин жара апIуз даршлу пай ву ва гьаци вудира гъубзди, дагъустанлуйири гьаци вуйиб, гьюкуматдин сяргьятар ва хатIасузвал уьрхюри, гизаф ражари субут дапIна, – гъапну дугъу. – Украинайиъ гъябгъюрайи хусуси метлеб айи операцияйиъ дагъустанлуйири, Ватан уьбхбан, Донецкдин ва Луганскдин йишвариин мясляаьт тасдикь апIбан, ислягь инсанарин уьмрар уьрхбан бадали, чпин улихь дивнайи месэлйир гьял апIури, дирбаш’вал ва игитвал улупура», – ачмиш гъапIнийи кIули гъабхурайи серенжемдин мяна Дербентдин главайин вазифйир вахтназ вуди тамам апIурайи Аьли Кьурбановди.
Му йигъан сягьнайилан гафар кIурайидар вари гьамусяаьт дюн’яйиъ ва гьюкуматдиъ гъягъюрайи гьядисйириз кьимат тувбаъ саб вуйи.
Фонтандин штарин экрандик, хусуси метлеб айи операцияйиъ иштирак шули, жанар диву дербентлу эскрарин шиклар улупнийи, ва думу игитарин гьюрматназ сессузвалин дакьикьа мялум гъапIнийи. Гъийин деврин нацистарихъди дявдиъ гъийиху ихь баярин хажалат зигбаъра, яшлуйирилан гъадабгъну бицIидариина гъяйиз, вардин дерднан гьиссар ттархьнайивал рябкъюрайи. Чпинуб дару жилиин дявдикк цIирцIар ккитри, халкьар хажалатнаъ ахьуз гъитнайи Западдин уьлкйир ихь гьюкумат дабгъбаз ккилигурайивалинра ва дурар ккилигнайиб аьхю ва сатIи Урусатдин жилиин даршлувалинра вари гъавриъ а.
Митинг «Дербент» ансамблин устадари ватанпервелвалин мяълийир апIбиинди ккудубкIну.
