Мялум вуйиганси, ихь уьлкейиъ вари регионариъ цци телевидение цифрайиинди улупувалиина алдапIну ккудубкIбанди ву. РД-йин мялуматарин, аьлакьайин ва махлукьатлу хабрарин дакьатарин министр Сергей Снегиревди улихьнаси мялум гъапIиганси, 3-пи июндихъан тина Дагъустан Республикайиъра цифрайиинди телевидениейиан улупувалиина улдучIвиди. Дугъу къайд гъапIиганси, РД-йин аьтафариин гьамусяаьт цифрайин телевидениейин сигнали 98 процент йишв ккапIра. Гьадму метлебниинди ккудубшу вахтна республикайиъ сигнал хътапIурайи 164 антенна дивну.
Цифрайиинди телевидениейиан улупбиина 3-пи июндихъан тина Табасаран райондиъра улдучIвиди. Дидихъди аьлакьалу вуйи ляхнар райондиъ гьеле ккудубшу йисхъан тина кIули гъахура. Райондин администрацияйин мялуматаринна коммуникацйирин технологйирин ва муниципалин гъуллугъар тувуб тешкил апIбан отделин начальник Рустам Ибрагьимовди ич гюрюшдиъ къайд гъапIнуки, цифрайиинди телевидениейиан улупбахьна улдучIвбахъди аьлакьалу вуди, сабпи нубатнаъ райондиъ телевышкайиан телевидениейин сигнал дяргъюрайи гъулар, кючйир, участокар аш-адарш, ахтармиш гъапIну. Вари гъуларин поселенйирин администрацйирин вакилар, волонтерар жалб дапIну, агьалйирин гьяятариз гъягъювал тешкил гъапIну.
«Дици гъягъбан метлеб – цифрайин телевидениейиина улдучIвруган, агьалйирин арайиз гъюз мумкин вуйи суалар, месэлйир, читинвалар аьгъю апIувал вуйич, – гъапнийи Рустам Ибрагьимовди. – ДумутIанра савайи, аьгьалйир цифрайиинди телевидениейиан улупбиина улдучIвуз гьязур хьувалин дережа аьгъю гъапIунча. Гьелбетда, агьалйириз цифрайиинди телевидениейиан улупбиина улдучIвбан гьякьнаан ва дид’ина улдучIвбан бадали гьапIну ккундуш, вари мялуматарра тувну ккундийи. Гьелбетда, – давам гъапIнийи Рустам Ибрагьимовди, – райондиъ телевышкайилан телевидениейин сигнал зяифди рубкьурайи ясана затра дурубкьрайи гъуларра а. Месела, Туруф. Думу гъулан агьалйири гъунши райондин телевышкайилан сигнал гъадабгъура. Цифрайиинди телевидение-йиан улупбиина улдучIвбан читинвалар дурариз адар. Хъа Хюряхъ гъулаъ телевышкайин сигнал затра адар. Гьаци, думу гъулан вари агьалйири ухдиан мина спутникдиан вуйи телевидение ишлетмиш апIура. Гьаддиз дурариз цифрайиинди телевидениейиан улупбиина улдучIвбахъди аьлакьалуди аьлава авадлугъар масу гъадагъбан тIалаблувал адар».
Цифрайин сигнал кьабул апIбан бадали, DVB-T2 стандартдин сигнал кьабул апIурайи телевизор лазим ву. Дицисдар телевизорар 2012-пи йислантина масу тувра. Хъа гьадму йисаз улихьна адагъу ва DVB-T2 сигнал кьабул дарапIрайи телевизорариз гьадму стандартдин цифрайин тялукь приставка ва дециметрйин волнйир кьабул апIру антенна лазим ву. Приставкйир туканариъ масу тувра. Дурарин кьиматар, месела, 800 манатдилан 1500 манатдихьна ву.
– Табасаран райондиъ, – къайд апIура Рустам Ибра-гьимовди, – саки 70 процент агьалйирин телевизорар DVB-T2 сигнал кьабул апIурайидар ву. Имбударира чпиз приставкйир масу гъадагъура. Учу кIули гъабхурайи мониторингдиз асас вуди, анжагъ ккудубшу гьяфтайиъ, месела, Хючнаъ туканариан агьалйири варжтIан артухъ тялукь приставкйир масу гъадагъну. Приставкйирин кьиматар 900-дилан 1350 манатдихьна ву.
Цифрайин эфирин телевидениейик кахъу агьал-йириз пулсузди сабпи ва кьюбпи мультиплексарин 20 цифрайин каналариз лигуз мумкинвал а. Сабпи мультиплекс: Сабпи канал, «Россия 1», «Матч ТВ», НТВ, Хьубпи канал, «Россия культура», «Россия 24», «Карусель», ОТР ва «ТВ Центр» ву. Кьюбпи мультиплекс: «Рен ТВ», «Спас», СТС, «Домашний», ТВ-3, «Пятница», «Звезда», «Мир», ТНТ ва «Муз-ТВ».
Къайд дапIну ккундуки, DVВ-Т2 стандартдин телевидениейиан улупбан мумкинвалар аьхюдар ву. Саб гъапиб, гизаф каналар, шиклар мар-цциди улупуру, дидиз аналогдин телевиденийизтIан гизаф мумкинвалар а, ва гьаци жара мумкинваларра.
Ич гюрюшдин аьхириъ Рустам Ибрагьимовди къайд гъапIиганси, Табасаран район цифрайиинди телевидениейиан улупувал кьабул апIуз саки гьязур ву.
