Ноябрин 2-пи йигъан аварарин «Гьякьикьат» газатдин конференцйир гъахру залиъ РД-йин военный комиссар Дайтбег Мустафаев республикайин СМИ-йин вакиларихъди гюрюшмиш гъахьнийи. Дугъу пресс-конференцияйиъ 2022-пи йисан РФ-диъ чвлин призыв гъабхбакан мялуматар тувнийи.

 

 

«Ноябрин 1-пи йигълан башламиш дапIну, Урусатдиъ яшнакк ккуркьнайи жигьилариз яракьлу кьувватарин жергйириъ гъуллугъ апIуз дих апIбан серенжемар ккергъна. Яракьлу кьувватарин жергйириз РФ-дин вари регионариан 120 агъзур ватандашдиз дих апIиди. Гъубшу йисандин чвлин улупбарихь тевиган, думу кьадар 7,5 агъзуриинди цIиб ву. Улихьна йисари призывдин вахт октябрин садпи йигълан ккебгъри шуйи, хъа гьаму йисан призыв саб вазлин кьанди ккебгъувал, бегьем дару мобилизацияйин месэлйири гьял апIури, военный комиссариатарин гъуллугъчйириз гъагъ алабхънайивалихъди аьлакьалу вуйи. Чвлин призывдин дахилнаъди 3,5 агъзуриинакьан дагъус-танлуйир армияйин жергйириз гъягъиди», – гъапну Дайтбег Мустафаевди.

Военный комиссарин гафариинди, Дагъустандиан чпин буржи тамам апIуз гъягъюрайи призывникари вари жюрейин кьушмарин жергйириъ гъуллугъ апIиди. Республикайин вари районариъ призывдин комиссйири ляхин ккебгъна. Ноябрин 8-9-пи йигъари ватандашарин сабпи дестйир военный гъуллугъназ гьауз хъюгъди.

«Республикайин военный комиссариат ва муниципальный военкоматар призывдин компания гъабхуз гьязурди а. Призывдихъди аьлакьалу серенжемар ккергъна. Армияйиз гъягъюрайидариз лазим вуйиб вари тамамди а. Республикайин военкоматдиъ телефондин «горячий линияйи» (88722) 63-88-69 ляхин апIура, дина дих дапIну, гъавриъ адру суаларин гьякьнаан жавабар гъадагъуз шулу», – гъапнийи чан улхбаъ республикайин военный комиссари.

Дугъу къайд гъапIганси, повестка дуфнайи призывник призывдин пунктназ дяргъювал – къанундин къайда чIур апIувал ву. Дицисдар ватандашар Урусатдин къанундиинди жавабдарвалихъна хиди.

Сабпи нубатнаъди яракьлу кьувватарин жергйириз улихьди бязи себебар ади армияйиз дурушди гъузнайи аьхю яшнан баяр, заан ва кьялан пишекарвалин образование айидар, дявдин гьисабнаъ айи пишейин эйсйир гьаъди.

«Призывдиинди армияйиз гъуху жигьилари, Луганскдин Халкьдин Республикайиъ, Донецкдин Халкьдин Республикайиъ, Херсонский ва Запорожский областариъ ктарди, Урусатдин вари аьтрафариин гъуллугъ гъабхиди», – къайд гъапIнийи РД-йин военный комиссари.