Республикайиъ «Земский доктор» программа уьмриз кечирмиш апIуз хъюгъхъанмина гъулан йишвариъ кадрйир кьитдитIан адрувалин месэла гьял апIбаъ уларикк ужудар натижйир рякъюра.
РД-йин сагъламвал уьбхбан министерствойин пресс-гъуллугъну туву мялуматниинди, анжагъ гьаму йисан 10 вазлин арайиъ Дагъустандин районарин ва участокарин больницйириъ ляхин апIуз медицинайин 107 пишекар гъушну.
«Духтрариз, чпин маважибдилан гъайри, сабишв’инди саб миллион манат тувра, хъа гъягъюз-гъюз читин йишварихь ерлешмиш духьнайи гъулариз гъягърудариз – саб миллионна гьацI. Фельдшерариз туврайи пулин кьадар 500 агъзур ва 750 агъзур ву. Программайин вахт ккудубкIбан кьяляхъра дурар йишвариин ляхин апIури гъузбан бадали, муниципалитетариз медицинайин пишекрариз яшайишдин шартIар тешкил апIбаъ кюмек тувуб табшурмиш дапIна», – къайд гъапIну пресс-гъуллугънан вакили.
Программа ляхник кипхъанмина ихь республикайиъ 1500-тIан артухъ пишекрар гъуларин медицинайин тешкилатариъ ляхин апIуз душна.
