АйтIан ляхнариз лигру министерствойиъ (МВД) лихурайи гъуллугъчйирин сабпи метлеб – агьалйирин ихтибарвал гъазанмиш апIуб ва дурарин сикинвал уьбхюб ву. Агьалйирихъди гьаммишан аьлакьайиъ айидар, гьелбетда, полицияйиан гьацдар вазифйир улупнайи участокдин инспекторар ву. Му гъуллугъ вафалувалиинди кIулиз адабгъурайидаригъ ихь ватанагьлийирра цIиб гъядар. Гьаму шиклик учвуз рякъюрайи касра дурарикан сар ву. Аьбдулгьюсеев Ренат Ризаханович Урусатдин МВД-йин Дагъустан Огни шагьрин отделин участковый вуди лихура.

 

 

Ренат Ризаханович Дербент шагьриз Табасаран райондин НичIрас гъул’ан удучIвну дуфнайи Ризахан ва Бике Аьбдулгьюсееварин хизандиъ бабкан гъахьну. Дурарин кюлфетдиъ айи кьюрид баярира гъи Дагъустандин Огни шагьрин полицияйиъ ляхин апIура.

Ренатди мектеб НичIрас гъулаъ ккудубкIну. Аьхю баб Шимшат ялгъузди ву кIури, абйир-бабари думу гъулаз гьаънийи. Хъасин Мягьячгъалайиъ ДГПУ-йин юридический факультетдик учIвну. 2011-пи йисан Ренат армияйин гъуллугъназ гъурхну, ва дугъу Новосибирск шагьриъ ракетйирин кьушмарин частнаъ эскервал гъапIну. Армияйин кьяляхъ Ренатди 2013-пи йисан Темрюк шагьриъ гьюлин пияда кьушмарин частнаъ контракт гъийибтIну ва 2015-пи йисазкьан гьадму гъуллугъ апIури гъузну. 2014-пи йисан Крым шагьриъ гъахьи гьядисйирихъди аьлакьалу вуди, Ренат Аьбдулгьюсеевдиз, гъуллугънан вазифйир заан жавабдарвалиинди тамам апIбаз ва зегьметнан чешне улупбаз лигну, Крым кьяляхъ апIбаз бахш вуйи медаль тувну. Дидхъан думу Огни шагьриъ гьамусяаьт айи гъуллугънаъ дийигъну. Му ляхниъра дугъаз, чан гъуллугънан вазифйирихьна заан жавабдарвалиинди янашмиш хьпаз лигну, жюрбежюр грамотйир тувна, ва ляхниъра дугъаз ва дугъан гъардшиз аьхю гьюрмат а.

Ренат Аьбдулгьюсеевдихъди узу, участковый инспекторарин пишекарвалин машквар мубарак апIури, гюрюшмиш гъахьунза. Дугъахъди вуйи сюгьбат саб жикъи вахтнатIан давам гъабхьундайич. Думу чаз зенг дапIнайи участокдиз гъягъюз гьялакди айи.

– Ренат Ризаханович, участковыйдин ляхин апIури швнуд йис вуяв?

– Узу участковый вуди 2017-пи йисхъанмина лихураза. Йиз аьхюну гъардаш Русландира Дагъустандин Огни шагьриъ МВД-йин полицияйиъ ляхин апIура. Абйир-бабариз айидар кьюр велед вуча, ва кьюридра Огни шагьриъ тахсиркарваларихъди женг гъабхбак, къанун-къайда мюгькам апIбак, хатIасузвал ва саламатвал тямин апIбак ич пай кивуз чалишмиш шулача.

– Уву ляхин апIурайи участокдиин фу кьадар агьалйир дуланмиш шула ва дурарин увухьна вуйи янашмиш’вал фициб ву?

– Гьамусяаьт, администрация-йин участокра кади, 28 кюче уз’ина ихтибарлу дапIна. Душваъ дуланмиш шулайи 4700 касдин узухьна вуйи янашмиш’вал, фици пуза, дюзмиш духьнайи шартIариан асиллу ву. МВД-йин гъуллугъчйири, фуну тахсиркар гъидисишра, сабпи нубатнаан учуз, участковыйдиз, дих апIуру, му яв участокдиан ву кIури. Бязи хизанар тахсиркарвалин гьисабнаъ айиз, дурарин узухьна вуйи лигувал фициб шул?! Инсанар жюрбежюрдар а. Мисалназ, улихьнаси жигьилар лазим дарубдиин машгъул духьнайивали, наркоманияйи ва убхъури хьували тахсрар апIрударин кьадар йислан-йисаз артухъ хьуз гъитрайи. Саспи абйир-бабари, чпин баяр-шубарин марццишнар апIури, дурарихъди вуйи ляхин бегьем кIулиз адабгъуз гъитурдайи. Хъа саспидар ич кюмекниинди чпин баяр-шубар чIуру ляхнарихьан ярхла апIуз гизаф чалашмиш шули гъахьну. Гъи аьгьвалат харжиди имдар. Учу дурар марццивалихъ, эдеблувалихъ хъауз гъизигу зегьметнакан дурариз цIибди вушра эсер гъабхьну.

– Уву гъуллугъ апIурайи участокдиин фициб ляхин гъабхури шулва?

– Узу гъуллугъ апIурайи участокдиин кьялан мектебар, училищйир, жюрбежюр жара карханйир ал. Душвариъ урхурайи ва лихурайи жигьиларин, иллагьки яшнакк ккуркьну адрударин, гьял-аьгьвал дериндиан ахтармиш апIури, гюрюшар гъахури, тербияйин ляхин яркьу апIури шулуча. Магьа натижайиъ узу ляхин апIурайи участокдиин йислан-йисаз тахсиркарвалар цIиб хьуз хъюгъну.

– Яв ляхин читинуб вуйин?

– Эгер инсандиз чан ляхин аьгъяш ва апIурайи ляхнихьна гьевес аш, зигурайи зегьметну фуну касдизра хуш’валтIан хурдар. Хъа ич ляхин, девир фици дигиш гъабхьиш, гьаддикан асилу ву. Учуз жюрбежюр дюшюшар алахьуру. Гьамусяаьтна ихь жигьиларра цIибди дигиш духьна. Улихьнаси убгъури, лазим дару уйинар апIури, абйир-бабар инжиг апIури имдар.
Гьарсаб ляхниъ чан читинвалар айиб ву, амма думу читинвалар ккагъували инсандиз хъана аьхю гьевес, саламатвал хуру.

– Ренат Ризаханович, увузра, яв гъардаш Русландизра ихь газатдин терефнаан ичв пишекарвалин машквар мубарак апIураза. Ичв ляхниъ хъанара аьхю хъуркьувалар ишри!