12-пи декабриъ Дагъустандин гьюкуматдин медицинайин университетдиъ урхурайи Табасаран райондиан вуйи студентарихъди Табасаран райондин глава Мягьямед Къурбанов университетдин актовый залиъ гюрюшмиш гъахьну. Му серенжемдин асас метлеб – урхбан кьяляхъ медицинайин университетдин выпускникар ляхнихъди тямин апIувал ва гьацира дурар «Земский духтир» программайиъ иштирак хьуз жалб апIувал ву.

 

ДГМУ-йин студентарин Табасаран райондин главайихъди вуйи гюрюшдиъ университетдин проректор Амурбег Къачабегов, республикайин медицинайин мялуматаринна анализ апIбан центрин директор Эдуард Мустафаев, лечебный факультетдин декан Руслан Савзиханов ва хъанара жара касар иштирак гъахьнийи.

Серенжем медицинайин университетдин 3-пи курснаъ урхурайи Самира Рамазановайи «Табасаран» мяълийиинди ачмиш гъапIнийи. Хъасин Мягьямед Къурбановди гъийин йигъан Табасаран райондиъ игьтияж айи пишекар духтрарин гьякьнаан уч духьнайидариз мялуматар тувнийи. Дугъан гафариинди, гьамусяаьт райондин поликлиникайиз травматолог-ортопед, дишагьлийирин уьзрариз лигру духтир, нарколог, рентгенолог, функциональный диагностикайин духтир, инфекционист ва гьацира бицIидарин эндокринологна отоларинголог ккунди а. Райондин больницайин реанимацияйин отделениейиз реаниматолог ва медицинайин тяди кюмекнан духтир лазим ву. Мидланра гъайри, гьамусяаьт СиртIич гъулан участокдин больницайиз хирург, Хюриккна ва ТинитIна участокдин терапевтарна педиатрар, хъа Мягьрягъ, Къужникк, ТIюрягъ ва Ярса гъулариз участокдин терапевтар чарасуз лазим ву.

«Гьаму узу ктуху игьтияж айи духтрарин пишйир учвкан шликIа дудубгъну аш, учву гъи вушра ляхниз гъадагъну, лазим вуйи вари шартIарихъдира тямин апIуз рази вуча. Аьхиримжи 3 йисандин арайиъ «Земский духтир» программайин дахилнаъди райондиъ 13 духтрар ляхнихъди тямин дапIна.

Мялум вуйиганси, райондиъ, кьялан больницаси, 2 участокдин больниц-йирра ва 52 ФАПарра а. Аьхиримжи 4-5 йисандин арайиъ, райондин медицинайин циркил артмиш апIбан бадали, хайлин ляхин дубхна: респуб-ликайин сагъламвал уьбхбан министерствойихъди сатIиди райондиъ 10 цIийи модульный ФАП-ар дивна, больница дибдиан рас дапIна, 100 йишв айи цIийи поликлиникайин тикилишчивалин ляхнар ккергъна. Республикайин жара районарихъди тевиш, Табасаран райондин медицинайин циркил лап улихь хьа», – къайд гъапIну райондин главайи.
Студентарихъди вуйи серенжемдиз дуфнайи хяларира гьамцдар гюрюшар кми-кмиди духну ккунивалинкан гъапнийи.
Серенжемдин аьхириъ медицинайин университетдиъ ужудар хъуркьувалариинди урхурайи Табасаран райондиан вуйи студентар райондин главайихьан вуйи чухсагъул мялум апIувалин кагъзариинди лишанлу гъапIну.