Спортдиъра, культурайин цирклиъра сарпир

 

 

Исмяилов Исмяил Шагьмирзаевич 1962-пи йисан 26-пи июндиъ Дербент шагьриъ бухгалтерин хизандиъ бабкан гъахьну. Дербентдин музыкайин училищейи ккудубкIну, 1987-2020-пи йисари райондин культурайин хулаъ жюрбежюр гъуллугъариин, аьхиримжи йисари культурайин хулан директорди гъилихну.

Исмяил Исмяилович ихь республикайиъ шашкйир уйнамиш апIбаан варитIан бажаранлу кас ву. Думу чан кIул’инди 4 ражари, командайихъди – 8 ражари Дагъустандин чемпион гъахьну. 2010-пи йисан дугъу шашкйириан дюн’яйин чемпионатдин финалиъ, 2017-пи ва 2021-пи йисари СКФО-йин чемпионатариъ иштирак’вал гъапIну, 2022-пи йисан Мягьячгъала шагьрин чемпион гъахьну. 2021-пи йисхъан мина Дагъустандин шашкйирин федерацияйин президентди лихура.

2020-пи йисхъанмина гъийин йигъазкьан дугъу Кьасум Мягьямедовдин ччвурнахъ хъайи Табасаран райондин бицIидарин искусствйирин мектебдин директорин вазифйир тамам апIура.
Гьаму кьюд йисандин арайиъ мектебдиъ урхурайидари республикайин 6 конкурсдиъ сабпи ва пешкешнан йишвар гъадагъна.