МРОТ за шула
Государствойин Думайин депутатари кьабул гъапIу къанундин проектдиз асас вуди, 1-пи январихъан маважибдин асккан кьадар 16242 манат вуди тасдикь шула. Гъубшу йисан МРОТ-дин кьадар 15279 манат вуйи. Къанундин проектдиъ гьацира 2023-2024-пи йисари МРОТ-дин гьисабарин къайда дигиш апIуб тIалаб апIура: думу Урусатдиъ яшамиш хьуз лазим вуди тяйин дапIнайи асккан кьадар пулилан асиллу ва думу кьадартIан 3 процентдиинди зади хьибди.
БицIидариз вуйи цIийи пособие
Урусатдин зегьметнан министерствойи 2023-пи йисан 1-пи январихъан бицIидар айи касибвал кайи хизанариз цIийи пособие тIапIра. Диди муганайиз айи яшайишдин кюмекнан вари уьлчмйир сатIи апIура. ЦIийи пособие гъадабгъбан бадали Урусатдин Яшайишдин фондназ аьрза хьади илтIикIну ккунду.
Яшайишдин цIийи фонд гьяракатнаъ убчIвра
2023-пи йисан 1-пи январихъан Урусатдиъ Пенсионный ва Яшайишдин страхованиейин фондар сатIи дапIну арайиз дуфнайи Яшайишдин фонд ляхник кипра. ЦIийи йисхъанмина яшайишдин вари пулар саб гъурулушдиан тяйин апIиди. Мицдар дигиш’валари яшайишдин цирклиан кюмек вуди уьлчмйир кьабул апIувал рягьят, дурарин ери за ва гъулайди тяйин апIуз мумкинвал тувиди.
Гьадму саб вахтна Яшайишдин фондну бюджетдин дару кьюбиб фондари улихьна тамам апIури гъахьи вари мажбурнамйир уьмриз кечермиш апIувал чаинна гъадабгъура. Гьамусдихъантина фунур касдихьанра, Урусатдин яшайишдин фонднан агьалйир гъуллугъарихъди тямин апIру офисдиз дуфну, «саб унчIвхъан» къайдайиъди улихьна вахтна ПФР-ри ва ФСС-ди тамам апIури гъахьи гъуллугъар гьуркIуз хьибди.
Налогар тувбан саб вуйи платеж
Гьамусдихъантина вари налогар ва страховой пулар саб вуйи платеждиинди тувуз хьибди. Варидиз саб вуйи налогарин счетдихьна рякъ ачмиш хьибди ва вари жюрейин налогар саб кагъзиинди ва сабишв’инди тувуз хьибди. Хъасин дурар налогарин идарайи жара апIиди.
Мидланра савайи, налогарин счетси, налогар тувбан ва уч апIбан вахтра саб хьибди. Муганайиз гьар вазлин 25, 30 ва 31-пи числойири налогар туврайиш, гьамусдихъантина гьар вазли 28-пи числойи налогарин гъуллугъну счетдиан пул ктабгъиди. Му цIийивалар страховой взносар, НДФЛ, гъазанждилан вуйи налог ва УСН-дин налог туврайидариинна тарагъура. Отчетар тувузра цIийи вахт тяйин дапIна – гьар вазлин 25-пи йигъ.
