19-пи январиъ Табасаран райондин культурайин, спортдин ва туризмдин управлениейин залиъ райондин культурайин идарйирин директорарихъди семинар-совещание кIули гъубшнийи.
Семинар-совещание Табасаран райондин культурайин управлениейин ляхнин натижйириз ва гележегдиз вуйи планариз бахш дапIнайи.
Серенжем Табасаран райондин культурайин, спортдин ва туризмдин управлениейин директор Аьбдулвагьаб Аьбдуловди ачмиш гъапIнийи. Дугъан гафариинди, мицдар семинарар тешкил дарапIри, сад йискьан вуйи, ва гьаму вахтна райондин культурайин цирклиъ хайлин дигиш’валар арайиз гъафну: Табасаран райондин культурайин хал дибдиан рас дапIна ва душваз лазим вуйи вари шей’ар духну дивна – деъру цIийи кьасйир, сягьна албагуз лазим вуйи мутмйир, музыкайин мукьмар йивру алатар. Саб жизби ляхнар кмишра, мушваъ магьа кьюбпи серенжем кIули гъубшну. Сабпиб ЦIийи йисаз тялукь вуйиб, кьюбпиб – райондин культурайин хуларин директорарихъди вуйи семинар-совещание. Вари кимбу ляхнар ккудукIбалан кьяляхъ, яркьу серенжемдиъди Табасаран райондинна Хьаргъарин гъулан культурайин хулар, гьацира райондин библиотекайин хал сатIиди ачмиш апIиди.
Управлениейин директории 2022-пи йисан культурайин цирклиъ гъазанмиш гъапIу хъуркьуваларикан ва гьелелиг ляхниъ гъузрайи нукьсанваларикан, пишекрарин бицIи маважибарикан, йискьубан аьхириъ культурайин цирклин гъуллугъчйири тувну ккуни планарикан ктибтнийи.
«Бабкан гъахьихъанмина 100 йис хьпахъди аьлакьалу вуди, 2023-пи йис Урусатдиъ Расул Гьямзатовдин йисси мялум дапIна. Ццийин йисан Дагъустан Республикайиъ Расул Гьямзатовдин яратмишариз бахш дапIнайи 40-рихьна серенжемар кIули гъягъиди. Табасаран райондиъра дицдар швнуб-саб серенжем тешкил дапIну ккунду. Культурайин цирклиз фукьан дакьатар жара гъапIишра, эгер дурар лазим вуйи саягъ ишлетмиш дарапIиш, тялукь натижйир хьидар. Ихь ляхин улихь гъябгъбан бадали, ухьу зегьмет дизигну ккунду. Мисалназ, райондин гизафсдар культурайин хулар хъяркьну шулу, хъа учвхъанди ичв ляхин жарари апIидар.
Сайтарин ляхинра, гъурмиш дапIну, цIийи алапIну ккунду. Учву апIурайи ляхникан аьгъю хьпан бадали, кIули гъуху вари серенжемарикан мялуматар культурайин сайтдиз хътаури апIинай.
Табасаран райондиъ халкьдин театр ачмиш апIбан бадали, сабсана ужуб спектакль дивну ккунду», – гъапнийи Аьбдулвагьаб Аьбдуловди.
Табасаран райондин культурайин, спортдин ва туризмдин управлениейин культурайин отделин кIулиъ айи Арсен Аслановди чан удучIвну улхбаъ къайд гъапIнийи: «Гьарсаб гъулаъ айи культурайин хулан пишекриз чан вазифйир аьгъяди ккунду. Культурайин идарайиъ чан ляхин дериндиан аьгъю пишекар лихуб лазим ву. Гьаци дархьиш, ляхин улихь гъябгъидар, хъа ихь улихь думу ляхни аьхю месэлйир дивра…
Гьамус жара районариъ, чпин аьхю насларин аьдатар кIваин апIури, мяълийир, ялхъвнар апIури, ухьутIан яркьуди фестивалар тешкил апIура. Ухьуз аьхю тарих ади, думу ачухъ дарапIди гъибтуз шулин?
Гьар йисан райондин мектебариъ урхурайидарин арайиъ «Учу бажаранлу касар агурача» ва жара конкурсар кIули гъахура.
Ихь халкьдин фольклор артмиш апIбазра аьхю фикир тувну ккунду, культурайин пишекрарин иштирак’валиинди жюрбежюр сягьнйир гьязур дапIну ккунду. Мектебариъра гьацдар бицIи сягьнйир диври, ихь бицIидарра культура-йихъди, аьдатарихъди вердиш гъапIиш, ужу ву».
Аьхиримжи вахтна республикайин гьюкмин ва райондин руководствойин терефнаан культурайиз артухъ фикир тувуз хъюгъна. Дици вуйивализ лигну, культурайин гъуллугъчйири республикайин ва райондин дережайиъди кIули гъягъру вари серенжемариъ жанлувара улупура.
