53 йисандин яшариъ айи, Къизлар райондиъ яшамиш шулайи БотIлих райондин Муни гъулан агьали Гъазимягьямед Гъазимягьямедовди рягьимлувалин терефнаан улупурайи гьунарарихъди республикайин хайлин агьалйир таниш ву. Гьаму заан тярифназ лайикьлу касди швнуб-саб мист дивну. Гьацира дугъу инвалид касариз, йитимариз ва касибариз гьаммишан кюмекар апIура. Аммаки чав апIурайи ляхнарикан дугъаз пуз ккунди шулдар.

 

 

Украинайин аьтрафариин хусуси метлеб айи дявдин операция ккебгъхъанмина, дина жигьилар гьаърайи военкоматдихъ Гъазимягьямед Гъазимягьямедовди саки гьар йигъан эскрариз чан терефнаан ипIруб (дюгдин аш) гьиври гъахьну. Мидкан хабар гъабхьи Дагъустан Республикайин Глава Сергей Меликовди дугъаз «Дагъустандин халкьдин Игит» ччвурра хъади Гъизилин хяд тувну.
Дугъу, рягьимлувалин ляхниъ алдабгъурайи гьарсаб гам Аллагь бадали вуйиз, кIура. Фицики, ихь гирами Кьур’андиъ дибикIнайиганси, ухьуз айи мумкинвалариз лигну, ужудар ляхнар апIбаан ухьу сар-сарин улихь хьади ккунду.

«Гьар йигъан рягьимлувалин ляхин апIри кIури, бабкан гъахьир вуза. Узу апIурайиб инсанариз кьабул дубхьну, дурар узухьна гъюри, чухсагъул мялум апIруган, думу узуз Аллагьун Тяаьлайи туврайи варитIан заан кьимат ву. Жара касариз ипIруб гьивуз узуз мумкинвал айивалиан гизаф бахтлу кас вуза. Гаш’вал кайириз, аьхъюди айириз мани ипIруб туву вахтна, дурар гизаф рази шулуш, дарш узу, пуз шулдарзухьан. Эгер узуз закурин йигъан фициб ужуб ляхин апIуруш вая шлиз кюмек тувруш аьгъдарш, думу йишван зат ахуз шулдарзухьан. Гьаддиз закурин йигъандин план гьязур дарапIди ахуз дахъударза. Фицики, йиз уьмрин бицIи манзилкьан инсанариз кюмек дарапIди, гьавайиди дубшну ккундариз. Байвахтнахъанмина гьаци вердиш гъахьир вуза. Инсанвал — инсанарин хасиятнан варитIан ужуб лишан ву. Узуз гьамциб жюрейиинди касибвал кайи инсанариз, йитимариз кюмек апIуз мумкинвал хьпан бадали, йиз улихь дивнайи кьаст кIулиз адабгъунза. Байвахтнахъанмина адашдихъди сабси марччлихъанвалра, хутIлин ляхнарра апIури гъахьунза. Яна узу зегьметнагьна юкIв алди тербияламиш апIбаз йиз абйир-бабариз чухсагъул кIураза», – къайд гъапIну рягьимлу касди.

Гъазимягьямед Гъазимягьяме-довди сабпи ражари вуди Къизлар шагьрин кьялан больницайиъ айидариз дюгдин аш гьязур гъапIну. Дугъан аш варидариз кьабул гъабхьну ва гьаддихъан дугъаз, дюгдин аш гьязур апIбан бадали, жюрбюжюр серенжемариз дих апIуз хъюгъну. Гьаз анжагъ дюгдин аш кIури гьерхган, Гъазимягьямед Гъазимягьямедовди жаваб туврайиганси, удрин мягьсуларикан дяхнин кьяляхъ варитIан мянфяаьтлуб дюгю ву. Хъа дюгдин аш – тухъ апIру хурагарикан саб ву.

«Узхьан, дюгдин аш гьязур апIру пишекар вуза, пуз шулдарзухьан, хъа думу инсанариз яманди кьабулди ву. Гьамусяаьт саки гьар йигъан республикайин шагьрариъ, районариъ аш гьязур апIури, инсанариз гьиври шулза. ГъипIдари, аш гизаф ицциб ву, кIура. Узу душвак йиккна гули ва кьутIна чарвайин рижвтIан артухъ гьич фукIара капIрадарза. Хъа вушра, Аллагьдихьна ккунивал ади, юкIв хъади гъапIу фунуб вушра хураг ицциб шулу.

Йиз уьмриъ варитIан гизаф дюгдин аш Бердянск шагьриъ 4 агъзур касдиз гьязур гъапIунза. Шагьрин агьалйириз рягьимлувалин кюмек хьади гъягъюрайи делегацияйихъди дина гъушур вуйза. 20 тоннайин рягьимлувалин кюмек гьапIбан кьяляхъ, гьаму касар цIибдикьан шад апIбан бадали, дураризра аш гьязур апIидиза кIури, фикир гъапIунза. Дина гьациб фикир ади гъушурра вуза. Узу гьязур гъапIу ашдин тяаьм агъю апIуз ккунди, нубутнахъди инсанар гъюрайивал гъябкъиган, йиз разивалин кьадар адайи. Думу йигъ, дина гъягъювал ва думу инсанар йиз зат кIваълан дурушур.
Мидаланра гъайри, ЦIийи йис улубкьайиз улихьна Мягьячгъалайин В.И. Лениндин ччвурнахъ хъайи кьялан майдандиинра 2 агъзур касдиз аш гьязур гъапIунза. Гьацира, хусуси метлеб айи дявдин операцияйиз жалб дапIнайи инсанар дина гьаайиз улихьна, призывникариз ва дурар гьаърайидаризра гьубкIри кIури, гьар ражари 300, 500, 600 касдиз аш гьязур апIури, дураризра гьиври гъахьунза. Кми-кмиди районарин больницйириъ, интернат-мектебариъ ва жара йишвариъра гьязур апIури шулза. Хъа, эгер артухъди гъубзиш, хулаз кьяляхъ гъюруган, рякъюъ алахъу инсанаризра пай апIури шулза», – кIура Гъазимягьямед Гъазимягьямедовди.

Учв Гъазимягьямед Гъазимягья-медов дилаварчивалин ляхинра апIурайи кас ву. Рякъюн гъирадихъ дугъаз саб цIийи кафе а. Гьадлин гъюрайи гъазанжнан аьхюну пай дугъу рягьимлувалин ляхнариз харж апIура. Чав апIурайи ужудар ляхнарин кюмекчи ва насигьятчи дугъан уьмрин юлдаш Загьра ву, ва гьацира дурариз чпин веледарира кюмек апIура.
«Аьхю дакьатар гъазанмиш гъапIиган, сар жвув бадали ваъ, хъа дурар жара касарихъдира харж дапIну ккунивалин йиз веледарра гъавриъ а. Гьациб фикир кIулиъ ади йиз худларра, гудларра аьхю духьну ккундиз.

Гъи узу апIурайи рягьимлувалин ляхин – гьациб ният дариз, думу йиз уьмур вуйиз. Гьар ражари аш гьязур апIру йигъан, узу лап ухди гъудужвури шулза. Дидихьна вуйи вари гьязурлугарра узу апIураза. Аш хъубкьайиз улихьна инсанариз чайра гьиври шулза. Узуз кIури гьязур гъапIу, 70 литри шид гъябгъру самоварра айиз. Гьаддиъ чай гьязур апIураза», – аьлава гъапIну Гъ.Гъазимягьямедовди.

Му касдин рягьимлувалин ляхнарин кьадар адар. Учуз айи мялуматаринди, саб ражари чан багъри гъул’ан Къизлар райондиз гъюрайиган, дугъу рякъюъ алахъу сар дишагьли чан машиндиъ итру. Дишагьлийи дугъаз чан дерднакан ктибтуру. Яна дугъу гурдим гьюдюхбан операция дапIну ккундийи. Гурдим дишагьлийиз дибихънайи, хъа дидихъ тувуз пул адайи. Мидкан хабар гъабхьи Гъазимягьямед Гъазимягьямедовди, дишлади чан дустарихьан буржназ лазим вуйи кьадар пул уч дапIну, дишагьлийиз кюмек гъапIну. ИкибаштIан, дишагьли сагъра гъахьну.
Му касдин гьамцдар рягьимлувалин ляхнарикан фукьан вушра пуз шулу. Гъит дугъаз Аллагьди мюгькам сагъ’вал ва инсанариз кюмек апIуз артухъ мумкинвалар туври.