Украинайиъ гъябгъюрайи хусуси метлеб айи дявдин операцияйиъ чпин хушниинди иштирак шулайидарин арайиъ табасаран халкьдин вакиларра хайлин а. Гьадрарикан сар – СиртIич гъулан агьали,Табасаран райондин главайин жямяьтлугъ ляхнарин кюмекчи вуйи Идаят Ибрагьимов (шиклиъ арччлахъанди) ву.
Узу ихь ватанагьли-йихъди телефондиан гаф-чIал гъапIунза. Ич сюгьбатнан эвеелиъ Идаятди гъапиганси, сач хусуси метлеб айи дявдин операция ккебгъу вахтна, думу гьамкьан яркьуди гьатIабццур ва кьаназ давам шул кIури, сар касдинра фикир дайи. Натижайиъ магьа йисандин арайиъ дяви давам шула.
«Вариси, узура телевизориан вая жара махлукьатлу хабрарин дакьатариан туврайи мялуматариъ хъпехъури гъахьунза. Хъа райондиз саки гьар йигъан дявдиъ гъийиху ихь баярин майтар хуз хъюгъиган, сабан дидин аьхир адрубдин ва ихь Ватан эскрари, чпин жанар фида апIури, уьбхюрайивалин гъавриъ гъахьунза. Ватан уьбхбак йиз пайра кивуз кIури, гьадмугантIан кьаст гъапIунза, фицики, йиз фикриан, гьарсар жилижви Ватандихъан жавабдар вуди ккунду, ва жвуван уьлке читин аьгьвалатнаъ айиган, дидиз жвувура кюмек апIувал чарасуз лазим ву. Гьамциб фикир дапIну, жвуван хушниинди дявдин операцияйиз гъя-гъюрза кIури, узу райондин военкоматдиз илтIикIнийза. Гьяйифки, гизаф бицIидарин адаш вуйивализ лигну, сабпи ражари узуз дина гъягъюз ихтияр тувундайи. Хъа узу, ихь эскрариз кюмекназ гъягъюз лап ижми кьаст дапIнайза. Сарун узу чпихъан хътадакруб аьгъю гъабхьиган, 16-пи декабриъ райондин военкоматдиан хусуси метлеб айи дявдин операцияйиъ иштирак хьуз ихтияр тувунзуз. Узухъди ич гъул’ан кьюрсана чпин хушниинди дуфнайи баяр хъазухъ. Ихтияр тувубси, узу ЛНР-иъ айи Халкьдин милицияйихъди контракт гъийибтIунза, фицики, узу аьлакьайин училищейиъ дурхнайир вуза ва му ляхин йиз пишейихъди аьлакьалуб ву», – ктибтнийи Идаят Ибрагьимовди.
Идаят Ибрагьимовдиз 5 велед а. ИкибаштIан, хизандин кIул ва бицIидарин адаш вуйивализ лигну, чан къарарикан багъри касариз пуз му касдизра думукьан рягьятди дайи. Дарпидира гъибтуз шулдайи. Сюгьбатчийин гафариинди, дугъан уьмрин юлдаш варибдин гъавриъ айи дишагьли ву. Гьаму ражарира чан жилирин къарарин тереф дюбхну, думу хусуси метлеб айи дявдин операцияйиъ иштирак хьуз гъягъюз дугъу манигъ’вал гъапIундайи.
«Узу хулаъ адрувалиан хизандиз гъагъиди шлубдинра гъавриъ айза. Вари хъайи-хъайиганси йиз уьмрин юлдшиз дупну, думу гъаврикк ккаунза. Думу учвра медицинайин пишекар ву. ИкибаштIан, гьадгъазра чан хизандин кIул дявдиз душну ккунди адайи, амма Ватан саб вуйивалин ва думу дюбхну ккунивалин гъавриъ айи. Хъа узу йиз терефнаан, дявдиз душну, ватанперпервалин буржи тамам дапIну, сагъ-саламатди кьяляхъ гъюз хизандиз гаф тувунза.
Магьа, мина дуфну, 3 вазтIан артухъ вуйиз. Луганск Халкьдин Республикайиъ гъуллугъ апIураза. Аьгьвалат гьелелиг гъагъиди гъубзра. Асас вуди узу апIурайи ляхин – блокпостниин гъаравулвал апIувал вуйиз, яна, сяргьятарилан миллетчйир вая жара йишвариан, дяви апIуз кIури, пулихъ гъадагъну, ихьдарихъди женгнаъ айи касар улдучIвуз гъидритувал», – кIура ихь эскри.
Сюгьбат давам апIури, Идаят Ибрагьимовдихьан эскрарин ипIруб — алабхьрубдихъди вуйи тяминваликан ва айи-адрубдиканра мялуматар гъадагънийза. Дугъу къайд гъапIганси, гъийин йигъаз гьелелиг читинвалар адар. Лазим вуйибдихъди гьюкуматдин терефнаан тямин апIура. Кми-кмиди инсанарихьан рягьимлувалин кюмекра гъюрайиваликан кIура.
«Магьа цIиб улихьнаси, Табасаран райондин глава Мягьямед Сиражудинович Къурбанов кIулиъ ади, саб ГАЗелиъ айи лазим вуйи шей’ар гъахунчуз. Уч’ин улукьбаз ва гьамциб кюмек апIбаз дугъаз чухсагъул.
Багъри райондиан дуфнайи кюмек багарихь хьайи жара частариан вуйидаризра пай гъапIунча. Гьаци жара йишварианра алабхьру мани палат, ипIруб ва медицинайин шей’ар гьаммишан хури шулу. Амма му дяви ву, гьаддиз вари лапра ужу ву пузра шулдар.
Мушваъ учу, Урусатдин жюрбежюр регионариан вуйи баяри, сар-сариз кюмек апIури, сар-сарин гъавриъ ади гъуллугъ гъабхурача. Ихь райондиан вуйи баярра хъазухъ. Улихь дивнайи вазифа тамам дапIну, иншаллагь, вари сагъ-саламатди кьяляхъ гъидича. Хъа аьгьвалат гьамциб вушра, мина гъювалиин затра швумал дарза. Хизандихъдира кми-кмиди аьлакьайиъ шулза. ИкибаштIан, веледар гъяркъиган, дурарин сес гъеебхьиган, дуфну улукьузра ккун шулу, хъа вушра, хулаз гъюз сабан гьялакди дарза», – аьлава гъапIнийи Идаят Ибрагьимовди.
