Гъябгъюрайи йисан 15-пи февралиан ккебгъну, 15-пи июлизкьан Дагъустан Республикайин Главайин грантариз вуйи конкурсдиъ иштирак хьуз аьрзйир кьабул апIура кIури, республикайин экономикайинна аьтрафарин артмиш’валин министерствойиан хабар тувра.

 

 

Му конкурс гьар йисан кIули гъябгъюрайиб ву, ва дидин асас метлеб – образованиейин, илмин, культурайин, махлукьатлу хабрарин, спортдин, экономикайин, жигьиларин политикайин, бицIи дилаварчивалин ва хъанара жара цирклариъ тартиб ва уьмриз кечирмиш апIурайи илминна ахтармишарин ва жюрбежюр жара проектариз удучIвурайи харжариз кюмек апIувал ву.

Къайд апIуб лазим вуки, Главайин грантарин конкурсдиъ, физический касарихьанси, юридический касарихьанра иштирак хьуз шулу, амма дурари уьмриз кечирмиш апIурайи проект республикайин аьрафариин кIулиз адабгъну ккунду. Конкурсдиъ иштирак шулайидариз, учв кIул’инди вушра вая илмин коллективдихъди сатIиди вушра, йисандин арайиъ анжагъ саб аьрзатIан тувуз ихтияр адар. Хъа аьрз-йир кIуруш, электрондин жюрейиинди «Йиз Дагъустан» порталиантина тувуз мумкинвал а. Грантарин конкурсдин натижайиъ 600 агъзур манатдин грантар 3 касдиз тувди. Эгер хъанара жара суалар арайиз гъюраш, 67-19-89 телефондин нумрайиз зенг дапIну, жавабар гъадагъуз шулу.