Сач чвлин вахтна гъурзу мягьсуларин бегьер гьаму йисан ужуб хьибди кIури, республикайиъ айи Россельхозцентрин филиалин кIулиъ айи Жанна Гъазанбиевайи «Табасарандин нурар» газатдин редакцияйиз мялуматар тувну.

 

 

Дугъан гафариинди, кьюб вазлин арайиъ республикайин жюрбежюр муниципалитетариъ, гьадму гьисабнаан ихь районариъра, мягьсулар дурзнайи саки 4 агъзур гектар хутIлариъ гъуху ахтармиш’валарин натижайиъ дурзнайи тумарин ери ужуб вуйивал ва дурарик уьзрар ктрувал ашкар гъабхьну. Уьзрар каш ахтармиш апIбан ляхин гьелелиг давамра шули ими.

«Къайд апIуз ккундузузки, сач чвлин вазари мягьсулар урзайиз улихьна ич центрин пишекрари, гьарсаб муниципалитетдиз гъягъюри, гъулан мяишатдин нежбрарихъди урзурайи тумарин, дурар жюрбежюр уьзрарихьан дюрхну ккунивалин гьякьнаан вая гьаму ляхнарихъди аьлакьалу хъанара жара месэлйириан гюрюшар кIули гъурхну, зегьметкешар дюзди ляхин дапIну ккунивалин гъаврикк ккаъну.

Мидланра гъайри, пуз ккундузузки, гьамус зегьметкешари чпира, ужудар натижйир хьпан бадали, урзурайи тумар лабораторйириз уьзрар каш ахтармиш апIуз хътаура. Эгер тумарик уьзур кайивал ашкар гъабхьиш, дицдар мягьсулар затра урзурадар. Хъа аьгъдарди дицдар тумар гъурзиш, уьзур кайивал ашкар хьпан кьяляхъ, жюрбежюр дармнар йивури, дурар дишлади сагъ апIуз чалишмиш шула. Амма мицдар дюшюшариъ, сагъ апIурча кIури, фукьан зегьмет гъизигишра, натижайиъ цIибтIан бегьер ккадабцIуз шулдар», — аьлава гъапIну Жанна Гъазанбиевайи.