Рягьимлувал, уж’вал апIувал ва кюмекнан хил гьачIабккувал – гьаму ляхрар Хив райондин дишагьлийирин советди чпин улихь асас вазифаси дивна. 8-пи мартдин улихь Хив райондин дишагьлийирин советдин кIулиъ айи Зумрият Сяидягьмедовайи узуз чпин тешкилатди гьаму цIийи йис ккебгъхъанмина фицдар ляхнар кIули гъухнуш, фицдар серенжемариъ иштирак гъахьнуш, гележегдиз чан улихь фицдар метлебар ва месэлйир дивраш, райондиъ СВО-йиъ айи эскрарин хизанариз, гизаф бицIидар айи ва касибвал кайи хизанариз фициб кюмек тувраш, райондин дишагьлийир гъи фицдар ляхнариин машгъул вуш, ктибтнийи.

 

 

 

«ЦIийи йис учу, уьлкейиъ тяйин дапIнайи Расул Гьямзатовдин 100 йис бахш дапIнайивализ ва насягьятчийин ва мялимдин йис вуйивализ лигну, тялукь серенжемар кIули гъахбалан ккебгънийча. Мидланра гъайри, ихь уьлкейиъ айи аьгьвалат фициб вуш рябкъюрачвуз. Украинайиъ хусуси метлеб айи дявдин операция кIули гъябгъюра. Гьамдихъди аьлакьалу вуди Хив райондин дишагьлийирин совет гьеле гъубшу йисхъан мина ихь эскрариз рягьимлувалин кюмек уч апIбиин ва думу йишвариина рубкьбиин машгъул ву. Хив районди рягьимлувалин кюмек швнуб-саб ражари хътапIну. Рягьимлувалин кюмек уч апIувал райондин глава Ярмет Ярметов кIулиъ ади тешкил апIури гъахьнийча. Думу кюмек, ихь эскрариз гашди а, палат вая саб фу-вуш жараб гьубкIрадар кIури, уч апIурайиб дар, хъа эскрарихьна улупурайи гьюрмат ва хатур ву. Гьаддиинди учу дурариз чпи гьархну адруваликан, дурар сагъ-саламатди, гъалибвалра хьади гъюбаз ккилигурайиваликан кIурача. Райондиан рягьимлувалин кюмек уч апIувалин серенжемариъ иштирак шулайи гьарсар ватандашдиз, райондин кIулин библиотекайин гъуллугъчйириз жа-жаради, гьацира райондин клубариз, библиотекйириз, бицIидарин багъариз, мектебариз чухсагъул мялум апIуз ккундузуз», – кIура Зумрият Сяидягьмедовайи.

Къайд апIуз ккундузузки, Хив райондиан мобилизацияйин дахилнаъди СВО-йиз 41 жигьил гъурхну, чпин хушниинди думу дявдиз 3 кас гъушну, хъа Хив райондиан вуйи 14 эскри, ватандин маракьар уьрхюри, чпин жанар фида гъапIну.

«Учу мобилизацияйин дахилнаъди СВО-йиз гъурху вари эскрарин дад-йириин, гьадму гьисабнаан дявдиъ гъийиху ва зийнар духьнайи игитарин хизанариин улукьурача. Фукьан вушра дерднан ва хажалатнан ляхин ву. Саб хизандиан дявдин женгариз швнур-сар бай душнайидарра хайлин а. Магьа гьаму йигъари учу Асккан Яракк гъулан Сефероварин хизандиин улукьуз гъушнийча. Думу хизандиъ 6 велед а. Дурарикан юкьур ихь ватан уьбхюз хусуси метлеб айи дявдин операцияйиз душна. Дадайи йигъ-йишв дюъйир урхура, чан веледар сагъ-саламатди хулаз гъюб ккун апIури, Аллагьдиз ккарагура.

Хив райондин дишагьлийирин советди, СВО-йиъ айи вари эскрарин хизанариин улукьбалан гъайри, уьмрин гъагъи аьгьвалатнаъ ахъу ва касибвал кайидаризра кюмек тувра. Мисалназ, гъул фунуб вуш пуз ккундарзуз, сар дишагьли, чан веледар ва жилир гатIахьну, удучIвну гъушну. Чан кьюр бицIи бай гъитуз жавабдар багахьлуйир адрувализ лигну, думу жилир дурар уьрхюри хулаъ гъузуз мажбур духьна. Дугъаз фукьан вушра аьзият ка. Учу думу хизандиз кми-кмиди учхьан шлу кюмек апIурача. Хъа касибвал кайи хизанар хъанара а. Амма дурариз чпин ччвурар кудухну ккундар. Хъа кюмек, икибаштIан, саки варидариз туврача.
Гьаму вари ляхнариъ узуз Хив райондин культурайин цирклин кIулиъ айи Казбек Зейнудинович Къазиев жаради лишанлу апIуз ккундузуз. Гьарсаб серенжем кIули гъабхбан жягьтлувал дугъхьан гъюрайибра ва дугъан тешкиллувалиинди кIули гъябгъюрайиб ву. Райондин дишагьлийин совет артмиш апIбаъ жанлуди кюмек тувувализ дугъаз чухсагъул мялум апIураза. Му кас саки гьаммишан ич гъвалахъ хъади шулу. Гьарган кюмек тувру. Казбек Зейнудинович аьхю жавабдарвал айи инсан ву. Мицдар инсанар райондиъ, гьяйиф цIибтIан адар», – къайд гъапIнийи йиз сюгьбатчийи.
Дугъан гафариинди, гъи Хив райондин дишагьлийир фагьумлудар, чпин метлебарихъ хъуркьрудар, улихь диву вазифйир тамам апIрудар ву. Яна дурар деврин кьяляхъ гъузрадар, аьксина вуди, бязи жилартIан саб лик улихьди гъягъюра.

«Гьаз узу мици кIура гъапиш, бязи жилар гъийин дишагьлийин мумкинвалар ва удукьувалар рякъюри, вари ихтиярар дугъан хилиз тувну, чпи кьяляхъ гъузра. Лихуз даккни жилариз гьаци рягьятди ву. Йиз фикриан, дурар дюз дар. Дишагьли жилиин улихь ваъ, кьяляхъ вая гъвалахъ духьну ккунду.
Сабсана, узуз мумкинвал ккабхъну имиди, «Табасарандин нурар» газатдин кюмекниинди вари бабар ва дадйир дишагьлийирин машкврихъди кIваантIан тебрик апIураза. Гизаф бабари чпин веледар гъи ватан уьбхюз гьаъна. Узу дурариз варидариз сабур, сагъ’вал, хизандин хушбахтлувал ва дявдин женгариъ айи веледар сагъ-саламатди хъадакну кьяляхъ гъювал ккун апIураза. Хъа имбу вари дишагьлийириз, бабариз, чйириз, шубариз бахт, мюгьюббат, артмиш’вал, чпин хизанариъ ва дустарин арайиъ гьюрмат хьувал ккун апIураза», – аьлава гъапIнийи Зумрият Сяидягьмедовайи.