Гъябгъюрайи йисан апрелин 15-30-пи йигъари Хив райондин уьмуми образованиейин мектебариъ урхурайидарин командйирин арайиъ футболиан райондин талитар кIули гъягъиди. Думу серенжемар 1941-1945-пи йисари гъабхьи Ватандин Аьхю дявдиъ гъадабгъу Гъалибвалин 78-пи йисаз бахш вуди тешкил апIурайидар ву.

 

 

Хив райондин культурайин ва туризмдин отделин дахилнаъ айи жигьиларин политикайинна спортдин пишекар Имамудин Агъабаевди ич сюгьбатнаъ къайд гъапIганси, талитар кьюб этапдиъди 7-11-пи классариъ урхурайидарикан тешкил дапIнайи командйирин арайиъ кIули гъахиди. Сабпи этап, зонйириз пай дапIну, 15-пи апрелиан 25-пи апрелиз, хъа, финал – 29-пи апрелиъ гъахуз планламиш дапIна.

«Райондин гъуларин уьмуми образование тувру мектебар 5 зонайиз пай дапIна. Сабпи зонайиз Хив, АрхъитI, Хирижв, Лика, ЦIинитI ва Цнал гъуларин мектебарин командйир дахил шула. Дурарин арайиъ талитар Хиварин мектебдиъ кIули гъягъиди. ГъванцIил, Кашкент, ЧIиллихъ, Дардаркент гъуларин мектебарин командйирин арайиъ талитар Кашкент гъулан кьялан мектебдиъ гъахуз улупна. Шубубпи зонайик кахьрайи Заан Яракк, Асккан Яракк, Мажвгул, Зилдикк, ЧIира ва Ккугъ гъуларин мектебарин командйирин арайиъ талитар Асккан Яракк гъулаъ, хъа юкьубпи зонайин – Гъвандикк, ЦIудухъ, Чювекк, ГъуштIил, Ургъа ва Ляхла гъуларин – мектебарин командйирин арайиъ талитар ГъуштIларин мектебдиъ гъахиди. Хьубпи зонайин – ЦIийи Фрюгъ, ЦIийи ЗахитI, Сюгют гъуларин – мектебарин командйирин арайиъ талитар ЦIийи Фрюгъ гъулан мектебдиъ хьиди. Гьарсаб зонайиъ кIули гъягъру талитарин йигъар 15-пи апрелилан 25-пи апрелиз командйири, тренерари ва судйири тяйин апIиди», – гъапнийи Имамудин Агъабаевди.

Финалин талитариз гьарсаб зонайиан 1-пи ва 2-пи йишвар гъадагъу командйир удучIвиди. Думу талитар апрелин 29-пи йигъан Хив гъулан асас стадиондиин кIули гъягъиди. Гьавйириз лигну, финалин талитар жара йигъан гъахубра мумкин ву.