Цци Дагъустандиъ бицIидарин 202 лагерь ачмиш апIуз кка – 25 шагьрин гъирагъдиъ айи стационарный лагерар ва 177 йигъандин вахт адапIрудар. БицIидарин хьадан рягьятвал тешкил апIбан кампанияйин вакиларин улупбариинди, гьаму йисан лагерариз 34 агъзур бицIир кьабул апIиди.
Дагъустандиъ, республикайин Глава Сергей Меликовдин табшуругъниинди, бицIидарин сагъламвал мюгькам апIру лагерар цIийи алаъбан программа уьмриз кечирмиш апIура. Думу программайин дахилнаъ гьюкуматдин ва муниципальный вари идарйир, гьацира гъийин йигъаз лихури адру 12 объект а.
Хьадан лагерар бицIидар кьабул апIбахьна фици гьязур шулаш ахтармиш апIбан бадали, улихьнаси Мягьячгъалайиъ Р. Гьямзатовдин ччвурнахъ хъайи милли библиотекайиъ бицIидарин хьадан рягьятвал тешкил апIбан месэлйириз лигру комиссияйин заседаниера гъабхьну. Душваъ удучIвну улхури, РД-йин образованиейин ва илимдин министр Ягь’я Бучаевди хабар тувганси, Дагъустандин аьтрафариин марцишнанна эпидемиология-йин ихтияр хьтру ва цIа кабхъувалин хатIасузвалин гьякьнаан тялукь акт адру лагерар бицIидарин рягьятвал гъадабгъру тешкилатарин сиягьназ гъадагъидар. Дидланра савайи, цци бицIидарин лагерариз гъягъювал планламиш апIурайи 500-тIан артухъ мялимари ва студентари-вожатйири ДИРО-йиъ чпин пишекарвалин ери за апIбан курсар ккудукIиди.
Лагерариз гъягъюз путевкйир сабпи нубатнаъди касибвал кайи, хусуси метлеб айи дявдин операцияйиъ иштирак шулайидарин хизанариан вуйи бицIидариз тувди. Путевкйирин гьякьнаан документар МФЦ-йиъ кьабул апIиди.
РД-йин Минздравдин комиссияйи 2023-пи йисан бицIидарин лагерариъ лихру духтрарин сиягь гьязур апIура. Гьарсаб лагериъ лицензия айи медицинайин кабинет хьибди. Багарихьди лагерариз лихуз гъягъру духтрарихъди тялукь аьгъюваларин дережа ахтармиш апIбан ляхин кIули гъабхиди.
Республикайин аьтрафариин ерлешмиш духьнайи бицIидарин лагерарин сиягь 5-пи майдиз гьязур хьибди. Думу Дагъустандин образованиейин ва илимдин министерствойин сайтдиъ чап апIиди.
